Foto:Almaty oblysynyŋ ÖKQ*
Almaty oblysynda jyr alyby Jambyl Jabaevtyŋ ūrpaǧy Qūryltai sailauynda öz taŋdauyn jasady. Aqynnyŋ otyzǧa juyq şöbere-şöpşegı aldymen Jambyl Jabaev atyndaǧy ädebi-memorialdyq muzeide jinalyp, atalarynyŋ ruhyna taǧzym ettı.
Keiın ǧasyr jasaǧan Jambyldyŋ şöberesı Saltanat Jambylova atasy turaly jyly estelık aityp, halyqty ūlt taǧdyryna tıkelei äser etetın tarihi sätte belsendı boluǧa şaqyrdy.
«Jambyl atamyz ǧūmyr boiy el bırlıgı men halyqtyŋ yntymaǧyn jyrlap öttı. Onyŋ ärbır jyrynan tuǧan jerge degen süiıspenşılık, el taǧdyryna degen alaŋdauşylyq sezıledı. Bız onyŋ ūrpaǧy retınde babamyzdyŋ osy amanatyna adal bolyp, eldıŋ bolaşaǧyna beijai qaramauymyz kerek. Bügın Qūryltai sailauyna qatysyp, ūlt taǧdyryna äser etetın tarihi sätte öz taŋdauymyzdy jasauǧa keldık», – dedı aqynnyŋ ūrpaǧy Saltanat Jambylova.
Muzeige kelgen qauym jyr alyby Jambyldyŋ äuletımen bırge sailau uchaskesıne jaiau bet aldy. Jol boiy dombyraşylar halyq küilerı men äuenderın oryndap, sailauşylarǧa merekelık köŋıl-küi syilady.
Jambyl Jabaev – otanǧa degen mahabbatty jyryna qosqan aqyn. Onyŋ öleŋderı bır jarym ǧasyr ötse de, özektılıgın joǧaltpai, halyqtyŋ jadynda sairap tūr. Sondyqtan aqynnyŋ ūrpaǧy da osy ūstanymnan ainyǧan emes. Olar qoǧam ömırıne belsene aralasyp, azamattyq taŋdau jasau arqyly el bolaşaǧyn aiqyndauǧa üles qosyp keledı.
Aita keterlıgı, biyl – qazaqtyŋ ūly aqyny Jambyl Jabaevtyŋ tuǧanyna 180 jyl. Ol ömırınıŋ soŋǧy jyldaryn Almaty oblysynda ötkızdı. Jyr alyby tūrǧan üi qazır Jambyl Jabaev atyndaǧy ädebi-memorialdyq muzei retınde jūmys ıstep tūr. Kielı şaŋyraqqa aqynnyŋ şöberesı Saltanat Jabaeva jetekşılık etude. Bügınde Jambyl äuletı – elge belgılı, halyq qūrmet tūtatyn azamattar. Jüz jasaǧan Jambyl atamyzdyŋ ūrpaǧy tügeldei Almaty oblysynda tūrady.
