«Zaŋ men tärtıp» qaǧidaty aiasynda Şymkent qalasynyŋ toǧyz joǧary oqu ornynda bırınşı kurs studentterıne arnalǧan «Qarjylyq qauıpsızdık» taqyrybynda bır mezette profilaktikalyq kezdesu öttı.
Jaŋa ortaǧa beiımdelıp, öz betınşe qarjylyq şeşımder qabyldai bastaǧan jastar üşın mūndai tüsındıru jūmystarynyŋ maŋyzy zor. Sebebı studenttık kezeŋde alǧaş ret bank kartasyn paidalanu, onlain sauda jasau, jūmys ızdeu, aqşa audaru nemese investisiiaǧa qyzyǧuşylyq tanytu siiaqty qarjylyq operasiialar köbeiedı.
Is-şaranyŋ negızgı maqsaty – qalaǧa jaŋadan kelgen studentterdı qarjylyq sauattylyqqa üiretıp, internettegı alaiaqtyq shemalardan, dropperlık äreketten, qarjylyq piramidalardan jäne zaŋsyz aqşa tabu ūsynystarynan saqtandyru. Kezdesudı Şymkent qalasynyŋ Jastar resurstyq ortalyǧy men Şymkent qalasy boiynşa Ekonomikalyq tergep-tekseru departamentınıŋ mamandary bırlese ūiymdastyrdy.
Kezdesu barysynda jastarǧa qazırgı kezde keŋ taraǧan qarjylyq qylmys türlerı tüsındırıldı. Sonyŋ ışınde dropperlıkke erekşe nazar audaryldy. Dropper dep öz bank şotyn, kartasyn nemese basqa da qarjylyq qūraldaryn üşınşı tūlǧalarǧa berıp, olardyŋ kömegımen aqşa audarymdaryn ötkızuge qatysatyn adamdardy ataidy. Sondyqtan mamandar jastarǧa bank kartasyn, şotyn, internet-bankingke kıru derekterın jäne özge de qarjylyq qūraldaryn bögde adamdarǧa bermeu qajettıgın eskerttı. Kezdesude qarjylyq piramidalardyŋ jūmys ısteu täsılderı de jan-jaqty tüsındırıldı. 
Is-şara barysynda söz alǧan Şymkent qalasy boiynşa Ekonomikalyq tergep-tekseru departamentınıŋ resmi ökılı Arujan Äljan qarjylyq qauıpsızdık mäselesınde jastardyŋ qūqyqtyq jäne qarjylyq sauattylyǧyn arttyrudyŋ maŋyzyn atap öttı. Onyŋ aituynşa, tüsındıru kezdesulerın bır apta boiy ötkızıp, şamamen 18 myŋ bırınşı kurs studentın qamtu josparlanyp otyr.
– Jastar öz qūqyqtaryn bıluı kerek, sonymen qatar, özgenıŋ qūqyǧyn qūrmetteuı qajet. Qazırgı zamanǧy alaiaqtyq türlerı, dropperlıkten, qarjylyq piramidalardan aulaq bolǧan jön.
Ol üşın jastar qarjylyq tūrǧydan sauatty ärı jan-jaqty boluy kerek, – dedı resmi ökıl.
Kezdesu barysynda studentter mamandarǧa özderın tolǧandyrǧan sūraqtaryn qoiyp, naqty jauaptar aldy. Äsırese internet arqyly jūmysqa ornalasu, bank kartasyn paidalanu, investisiialyq ūsynystardy tekseru, äleumettık jelıdegı jarnamalardyŋ şynaiylyǧyn anyqtau jäne kümändı qarjylyq operasiialarǧa qatysty sūraqtar talqylandy.
