Kaspii jaǧalauyndaǧy oqu-jattyǧu kezınde toǧyz äskeri qyzmetker qaza tapty. Qaiǧyly jaǧdai 24 qyrküiekte bolǧan, dep habarlaidy «Adyrna» tılşısı.
Kaspii teŋızınıŋ jaǧalauynda oqu-jauyngerlık mındetterdı oryndau kezınde aua raiynyŋ kürt naşarlap, jeldıŋ küşeiuı saldarynan äskeri qyzmetşılerdı teŋız alyp ketken.
Aldyn ala aqparat boiynşa, oqiǧa kezınde teŋızge 19 äskeri qyzmetker ketken. Qazırgı uaqytta olardyŋ toǧyzynyŋ qaza bolǧany belgılı boldy. Üş äskeri qyzmetker qūtqarylyp, olardyŋ bıreuı auruhanaǧa jetkızılgen. Qalǧan äskeri qyzmetkerlerdı ızdestıru jūmystary jalǧasyp jatyr.
Oqiǧa ornyna qūtqaru qyzmetterınıŋ küşterı men qūraldary jedel jıberıldı. Izdestıru-qūtqaru operasiiasyna Äskeri-teŋız küşterı, Tötenşe jaǧdailar ministrlıgı bölımşelerı, aviasiia jäne özge de tiıstı qyzmetter jūmyldyrylǧan.
Oqiǧanyŋ män-jaiyn anyqtau jäne qūtqaru jūmystaryn üilestıru üşın Maŋǧystau oblysyna Qorǧanys ministrı, aviasiia general-leitenanty Däuren Qosanovtyŋ jetekşılıgımen arnaiy komissiia attandy.
Qorǧanys ministrlıgı qaza bolǧan äskeri qyzmetşılerdıŋ tuǧan-tuystary men jaqyndaryna köŋıl aityp, olardyŋ otbasylaryna qajettı kömek körsetıletının mälımdedı. Izdestıru jūmystary men äskeri qyzmetşılerdıŋ jaǧdaiy turaly qosymşa aqparat keiınırek jariialanady.
Būǧan deiın Qazaqstannyŋ Äskeri-teŋız küşterı Kaspii teŋızınde josparly oqu-jattyǧu jūmystaryn bastaǧanyn jazǧan edık. Al Kaspiidıŋ Äzerbaijan jaǧalauynda 22 qyrküiekte Äzerbaijan jäne Kaspiimen şektespeitın Türkiia men Özbekstan qosyndarynyŋ qatysuymen äskeri jattyǧu bastalǧan.
