كاسپي جاعالاۋىنداعى وقۋ-جاتتىعۋ كەزىندە توعىز اسكەري قىزمەتكەر قازا تاپتى. قايعىلى جاعداي 24 قىركۇيەكتە بولعان، دەپ حابارلايدى «ادىرنا» ءتىلشىسى.
كاسپي تەڭىزىنىڭ جاعالاۋىندا وقۋ-جاۋىنگەرلىك مىندەتتەردى ورىنداۋ كەزىندە اۋا رايىنىڭ كۇرت ناشارلاپ، جەلدىڭ كۇشەيۋى سالدارىنان اسكەري قىزمەتشىلەردى تەڭىز الىپ كەتكەن.
الدىن الا اقپارات بويىنشا، وقيعا كەزىندە تەڭىزگە 19 اسكەري قىزمەتكەر كەتكەن. قازىرگى ۋاقىتتا ولاردىڭ توعىزىنىڭ قازا بولعانى بەلگىلى بولدى. ءۇش اسكەري قىزمەتكەر قۇتقارىلىپ، ولاردىڭ بىرەۋى اۋرۋحاناعا جەتكىزىلگەن. قالعان اسكەري قىزمەتكەرلەردى ىزدەستىرۋ جۇمىستارى جالعاسىپ جاتىر.
وقيعا ورنىنا قۇتقارۋ قىزمەتتەرىنىڭ كۇشتەرى مەن قۇرالدارى جەدەل جىبەرىلدى. ىزدەستىرۋ-قۇتقارۋ وپەراتسياسىنا اسكەري-تەڭىز كۇشتەرى، توتەنشە جاعدايلار مينيسترلىگى بولىمشەلەرى، اۆياتسيا جانە وزگە دە ءتيىستى قىزمەتتەر جۇمىلدىرىلعان.
وقيعانىڭ ءمان-جايىن انىقتاۋ جانە قۇتقارۋ جۇمىستارىن ۇيلەستىرۋ ءۇشىن ماڭعىستاۋ وبلىسىنا قورعانىس ءمينيسترى، اۆياتسيا گەنەرال-لەيتەنانتى داۋرەن قوسانوۆتىڭ جەتەكشىلىگىمەن ارنايى كوميسسيا اتتاندى.
قورعانىس مينيسترلىگى قازا بولعان اسكەري قىزمەتشىلەردىڭ تۋعان-تۋىستارى مەن جاقىندارىنا كوڭىل ايتىپ، ولاردىڭ وتباسىلارىنا قاجەتتى كومەك كورسەتىلەتىنىن مالىمدەدى. ىزدەستىرۋ جۇمىستارى مەن اسكەري قىزمەتشىلەردىڭ جاعدايى تۋرالى قوسىمشا اقپارات كەيىنىرەك جاريالانادى.
بۇعان دەيىن قازاقستاننىڭ اسكەري-تەڭىز كۇشتەرى كاسپي تەڭىزىندە جوسپارلى وقۋ-جاتتىعۋ جۇمىستارىن باستاعانىن جازعان ەدىك. ال كاسپيدىڭ ازەربايجان جاعالاۋىندا 22 قىركۇيەكتە ازەربايجان جانە كاسپيمەن شەكتەسپەيتىن تۇركيا مەن وزبەكستان قوسىندارىنىڭ قاتىسۋىمەن اسكەري جاتتىعۋ باستالعان.
