Qazaqstanda ǧimarattar men qoǧamdyq nysandarǧa zaŋsyz salynǧan suretter men jazulardy anyqtau boiynşa reidter jürgızıldı, dep habarlaidy "Adyrna".
Işkı ıster ministrlıgınıŋ mälımetınşe, ekı kün ışınde 524 reid pen tekseru ūiymdastyrylyp, 2,3 myŋnan astam zaŋsyz graffiti anyqtalǧan.
Anyqtalǧan derekterdıŋ toǧyzy boiynşa äkımşılık qūqyq būzuşylyq turaly hattama toltyryldy. Olar ǧimarattardy, qūrylystardy jäne basqa da qoǧamdyq oryndardy qorlau faktılerıne qatysty.
Sonymen qatar Şymkent qalasynda esırtkı qūraldaryn, psihotroptyq zattardy jäne olardyŋ analogtaryn nasihattau nemese zaŋsyz jarnamalau faktısı boiynşa sotqa deiıngı tergep-tekseru bastaldy.
Zaŋsyz graffitige qatysty baqylau Memleket basşysy Qasym-Jomart Toqaevtyŋ qoǧamdyq ǧimarattarǧa suretter men jazulardy zaŋsyz saluǧa jol bermeu turaly tapsyrmasynan keiın küşeitıldı.
Būǧan deiın deputattar graffiti jiı salynatyn oryndardyŋ arnaiy kartasyn äzırleudı ūsynǧan. Mūndai aumaqtarda patruldeu men beinebaqylaudy küşeitu, sondai-aq qūqyq būzuşylyqtyŋ aldyn alu şaralaryn jürgızu ūsynyldy.
Sonymen bırge strit-art ökılderıne şyǧarmaşylyq jūmystaryn zaŋ aiasynda oryndauǧa mümkındık beretın arnaiy alaŋdar belgıleu mäselesı de qarastyrylyp jatyr.
