قازاقستاندا عيماراتتار مەن قوعامدىق نىساندارعا زاڭسىز سالىنعان سۋرەتتەر مەن جازۋلاردى انىقتاۋ بويىنشا رەيدتەر جۇرگىزىلدى، دەپ حابارلايدى "ادىرنا".
ىشكى ىستەر مينيسترلىگىنىڭ مالىمەتىنشە، ەكى كۇن ىشىندە 524 رەيد پەن تەكسەرۋ ۇيىمداستىرىلىپ، 2,3 مىڭنان استام زاڭسىز گراففيتي انىقتالعان.
انىقتالعان دەرەكتەردىڭ توعىزى بويىنشا اكىمشىلىك قۇقىق بۇزۋشىلىق تۋرالى حاتتاما تولتىرىلدى. ولار عيماراتتاردى، قۇرىلىستاردى جانە باسقا دا قوعامدىق ورىنداردى قورلاۋ فاكتىلەرىنە قاتىستى.
سونىمەن قاتار شىمكەنت قالاسىندا ەسىرتكى قۇرالدارىن، پسيحوتروپتىق زاتتاردى جانە ولاردىڭ انالوگتارىن ناسيحاتتاۋ نەمەسە زاڭسىز جارنامالاۋ فاكتىسى بويىنشا سوتقا دەيىنگى تەرگەپ-تەكسەرۋ باستالدى.
زاڭسىز گراففيتيگە قاتىستى باقىلاۋ مەملەكەت باسشىسى قاسىم-جومارت توقاەۆتىڭ قوعامدىق عيماراتتارعا سۋرەتتەر مەن جازۋلاردى زاڭسىز سالۋعا جول بەرمەۋ تۋرالى تاپسىرماسىنان كەيىن كۇشەيتىلدى.
بۇعان دەيىن دەپۋتاتتار گراففيتي ءجيى سالىناتىن ورىنداردىڭ ارنايى كارتاسىن ازىرلەۋدى ۇسىنعان. مۇنداي اۋماقتاردا پاترۋلدەۋ مەن بەينەباقىلاۋدى كۇشەيتۋ، سونداي-اق قۇقىق بۇزۋشىلىقتىڭ الدىن الۋ شارالارىن جۇرگىزۋ ۇسىنىلدى.
سونىمەن بىرگە ستريت-ارت وكىلدەرىنە شىعارماشىلىق جۇمىستارىن زاڭ اياسىندا ورىنداۋعا مۇمكىندىك بەرەتىن ارنايى الاڭدار بەلگىلەۋ ماسەلەسى دە قاراستىرىلىپ جاتىر.
