Prezident Qasym-Jomart Toqaev Qazaqstan men Qytai arasyndaǧy mäŋgı jäne jan-jaqty strategiialyq serıktestık berık tarihi negızge süienetının atap öttı. Memleket basşysynyŋ aituynşa, ekı el arasyndaǧy qarym-qatynas özara senım men tatu körşılık qaǧidattary negızınde jaŋa qarqynmen damyp keledı. Būl turaly Aqorda jariialady, dep habarlaidy "Adyrna".
El basşysy būl turaly 25 qyrküiekte Almatyda ötken «Qazaqstan – Qytai» investisiialyq forumynda aitty.
Prezident qazaq-qytai bailanystarynyŋ sapalyq tūrǧydan jaŋa deŋgeige köterılgenın aitty. Onyŋ sözınşe, būǧan Qytai töraǧasy Si Szinpinnıŋ tıkelei qoldauy maŋyzdy yqpal etıp otyr.
«Bız mäŋgılık dos ärı senımdı serıktes retınde yntymaqtastyǧymyzdyŋ jaŋa “altyn 30 jyldyq” kezeŋıne qadam basyp jatyrmyz», – dedı Qasym-Jomart Toqaev.
Memleket basşysy Qytaidyŋ Qazaqstannyŋ eŋ ırı sauda serıktesı ekenın atap öttı. Byltyr ekı el arasyndaǧy tauar ainalymy rekordtyq körsetkışke jetıp, 50 milliard dollarǧa juyqtaǧan. Qazır ekı eldıŋ ükımetterı būl kölemdı 100 milliard dollarǧa deiın arttyru baǧytynda jūmys ıstep jatyr.
İnvestisiialyq yntymaqtastyq ta tūraqty türde damyp keledı. Qytaidyŋ Qazaqstan ekonomikasyna salǧan investisiiasy 29 milliard dollardan asqan. Osylaişa, Qytai elımızdıŋ ırı investorlarynyŋ bırıne ainaldy. Qazırgı uaqytta Qazaqstanda Qytaidyŋ qatysuymen 9 myŋnan astam käsıporyn jūmys ıstep jatyr.
Toqaevtyŋ aituynşa, ekı el arasyndaǧy serıktestık önerkäsıp, sifrlandyru, «aqyldy qalalar», sputniktık tehnologiialar, auyl şaruaşylyǧy, densaulyq saqtau jäne bılım beru salalaryn da qamtidy.
Prezident İnvestisiialardy kötermeleu jäne özara qorǧau turaly kelısımnıŋ ratifikasiialanuy ekıjaqty ekonomikalyq yntymaqtastyqty damytuǧa qajettı qūqyqtyq negız qalyptastyrǧanyn atap öttı.
Sonymen qatar Memleket basşysy Qazaqstan men Qytai arasyndaǧy vizasyz rejimnıŋ ıskerlık bailanystardyŋ keŋeiuıne oŋ äser etıp otyrǧanyn aitty.
«Qazırgı kezde Qazaqstanda qomaqty investisiia tartyp, ırı jobalardy ıske asyruǧa barynşa oŋtaily jaǧdai jasalǧan dep senımmen aituǧa bolady», – dedı Prezident.
Onyŋ aituynşa, biyl 1 şıldede küşıne engen Konstitusiianyŋ negızgı erejelerı eldıŋ investisiialyq äleuetın nyǧaituǧa qūqyqtyq negız qalyptastyrdy.
Forum bastalar aldynda jiynǧa qatysuşylar Maŋǧystau oblysynda bolǧan qaiǧyly oqiǧa saldarynan qaza tapqan äskeri qyzmetşılerdı bır minut ünsızdıkpen eske aldy.
