Atyrau oblysynyŋ mamandandyrylǧan audanaralyq äkımşılık soty Qaşaǧan ken ornyn igeruşı NCOC kompaniiasynyŋ 2,3 trln teŋge kölemındegı aiyppūldy öndırıp aluǧa bailanysty atqaruşylyq ıs jürgızudı toqtatu turaly talabyn qanaǧattandyrmady. Sot şeşımı 2026 jylǧy 23 qyrküiekte qabyldanǧan, dep habarlaidy "Adyrna".
Kompaniia sottan memlekettık sot oryndauşysynyŋ atqaruşylyq ıs jürgızudı bastau turaly 21 şıldedegı qaulysyn, sondai-aq jyljymaityn mülık pen kölık qūraldaryna tyiym salu jönındegı qaulylardy zaŋsyz dep tanudy sūraǧan. Būdan bölek, NCOC 23 jäne 30 şıldede belgılı bır äreketterdı jasauǧa engızılgen şekteulerdıŋ küşın joiudy talap ettı.
Alaida sot kompaniianyŋ atalǧan talaptarynyŋ barlyǧyn qanaǧattandyrudan bas tartty. Sot aktısıne tüpkılıktı nysanda şyǧarylǧan künnen bastap 10 jūmys künı ışınde apelliasiialyq tärtıppen şaǧym beruge bolady.
2,3 trln teŋge kölemındegı talapty Qazaqstannyŋ Ekologiia jäne tabiǧi resurstar ministrlıgı 2023 jyly engızgen. Būǧan Qaşaǧan ken ornynda kükırttı belgılengen mölşerden artyq saqtau faktılerı negız bolǧan.
NCOC kompaniiasy aiyppūlmen kelıspeitının aityp, halyqaralyq törelık räsımderge jügıngen. Al Qazaqstan tarapy sot şeşımınıŋ zaŋdy küşıne engenın jäne ony oryndau mındettı ekenın mälımdegen.
Atqaruşylyq ıs jürgızu bastalǧannan keiın Atyrau oblysy boiynşa ekologiia departamentınıŋ basşysy Asqar Jüsıpov öndırıp alu jönındegı atqaruşylyq qūjatty oryndau merzımı ekı ai ekenın aitqan.
Alaida 7 qyrküiekte 2,3 trln teŋgenı öndırıp aluǧa qatysty atqaruşylyq ıs uaqytşa toqtatylǧany belgılı boldy. Būl aqparat atqaruşylyq ıs jürgızu organdarynyŋ avtomattandyrylǧan aqparattyq jüiesınde körsetılgen.
Ädılet ministrlıgı atqaruşylyq ıs jürgızudıŋ uaqytşa toqtatyluyn NCOC kompaniiasynyŋ memlekettık sot oryndauşysynyŋ äreketterıne şaǧym tüsıruımen bailanystyrdy. Osyǧan bailanysty Atyrau oblysynyŋ mamandandyrylǧan audanaralyq äkımşılık soty atqaruşylyq ıs jürgızu materialdaryn sūratqan.
Endı sottyŋ 23 qyrküiektegı şeşımı apelliasiialyq tärtıppen qaita qaraluy mümkın.
