Qyrǧyzstanda «Sosial-demokrattar ısı» boiynşa ükım şyqty. Eldıŋ būrynǧy prezidentı Almazbek Atambaevtyŋ 33 jastaǧy ūly Qadyrbek Atambaev 4 jylǧa bas bostandyǧynan aiyryldy, dep habarlaidy «Adyrna» tılşısı Kaktus.media-ǧa sılteme jasap.
Basylym mälımetınşe, 2025 jyldyŋ qaraşa aiynyŋ soŋynda jappai tärtıpsızdık ūiymdastyruǧa daiyndaldy degen küdıkpen «Sosial-demokrattar» partiiasynyŋ ökılderı ūstalǧan. Sol kezde Qyrǧyzstan IIM on adamnyŋ qamauǧa alynǧanyn habarlaǧan edı. Tergeu nūsqasyna säikes, olar Jogorku Keŋeş deputattarynyŋ kezekten tys sailauynan keiın jappai narazylyq aksiialaryn ötkızudı josparlaǧan.
Ūstalǧandardyŋ qatarynda būrynǧy prezident Almazbek Atambaevtyŋ ūly Qadyrbek Atambaev, saiasatkerler Temırlan Sūltanbekov pen Ermek Ermatov, Jogorku Keŋestıŋ būrynǧy deputattary Qubanychbek Qadyrov pen Şailoobek Atazov, käsıpker Urmat Baryqtabasov, Atambaevtyŋ būrynǧy oqqaǧary Damir Musakeev jäne basqa da tūlǧalar bolǧan.
Bügın, 8 qazanda Bışkekte būl ıs boiynşa jabyq rejimde sot ükımı jariialanǧan. Sudia keŋesu bölmesınen oralǧannan keiın aiyptau ükımın şyǧarǧan. Atap aitsaq, Temırlan Sūltanbekov 7 jylǧa, Qadyrbek Atambaev 4 jylǧa sottaldy. Al Äbdukärım Äbdırahmanov 8 jylǧa bas bostandyǧynan aiyryldy. Ol būǧan deiın de Alamüdün audandyq sotynyŋ şeşımımen alaiaqtyq ısı boiynşa sottalǧan bolatyn.
Al Ermek Ermatovqa qatysty aiyp baby jeŋıldetılıp, probasiialyq baqylau qoldanyldy. Ol sot zalynan bosatyldy. Qubanychbek Qadyrov tolyq aqtaldy.
Sondai-aq Qazaqstan azamaty Serıkbai Qabylanbek sot zalynan bosatyldy. Ol jazasyn ötep bolǧandyqtan, keiınnen Qyrǧyzstan aumaǧynan şyǧarylatyn boldy.
Eske salaiyq, 2025 jyldyŋ qaraşasynda Qyrǧyzstan IIM Jogorku Keŋeş sailauynan keiın jappai tärtıpsızdık ūiymdastyrudy közdegen destruktivtı top müşelerınıŋ ūstalǧanyn habarlaǧan edı. Tergeu deregıne säikes, top qūramynda saiasatkerler, būrynǧy deputattar, eks-memlekettık qyzmetkerler men küştık qūrylymdardyŋ būrynǧy qyzmetkerlerı bolǧan. Olar jaqtastaryn, onyŋ ışınde ūiymdasqan qylmystyq toptar men sporttyq qauymdastyq ökılderın tartyp, arandatu äreketterı men küş qoldanu arqyly qaqtyǧystar ūiymdastyrudy közdegen.
Al Qadyrbek Atambaevtyŋ özı būǧan deiın özıne taǧylǧan aiyptyŋ auyrlatylǧanyn aityp, oǧan bilıktı küşpen basyp aluǧa äreket jasau baby boiynşa aiyp taǧylǧanyn mälımdegen.
