Bügın, 18 qaraşada Maŋǧystau oblysynyŋ äkımı Nūrdäulet Qilybai Maŋǧystau audanyna jūmys sapary aiasynda Şaiyr auyldyq okrugıne qarasty Tasmūryn jerındegı bidai ösıru jobasynyŋ barysymen tanysty. Is-şarada alqapqa alǧaşqy küzdık bidai tūqymy sebıldı.
Atalǧan aumaqta auyl şaruaşylyǧy salasyn damytuǧa baǧyttalǧan ırı investisiialyq joba qolǧa alynǧan. Joba aiasynda «Maqsat» şarua qojalyǧyna kartop jäne bidai ösıru maqsatynda 2 myŋ gektar jer uchaskesı üş jyl merzımge jalǧa berılgen.

Qazırgı taŋda şaruaşylyqta küzdık bidai eguge baǧyttalǧan agrotehnikalyq jūmystar jürgızılude. Biylǧy egıs nauqanynda 300 gektar jer öŋdelgen. Jer jyrtu, topyraqty qūnarlandyru jäne tūqym sebu jūmystary bastalǧan. Egıs jäne jinau jūmystaryna qajettı traktor, soqa, tūqym sepkış jäne kombain tehnikalary bar. Bügınde şaruaşylyqta 15 adam eŋbek etedı.
Küzdık bidaidyŋ är gektarynan 15-20 sentner önım alu josparlanyp otyr. Osylaişa, 300 gektar alqaptan alynatyn jalpy önım kölemı 450-600 tonnany qūraidy.
Oblys äkımı Nūrdäulet Qilybai egıs alqabyndaǧy jūmystardyŋ barysyn körıp, auyl şaruaşylyǧy baǧytyndaǧy mūndai jobalardy jüielı jüzege asyru, jerdı tiımdı paidalanu jäne egın şaruaşylyǧyn damytudyŋ maŋyzdylyǧyn atap öttı. Sondai-aq, qolǧa alynǧan jūmystyŋ nätijelı boluy üşın qoldau bolatynyn jetkızdı.
