2022 jyly 10 myŋ orynǧa arnalǧan 35 studentter jataqhanasy paidalanuǧa berıledı. Būl turaly Premer-ministrdıŋ orynbasary Eraly Toǧjanovtyŋ töraǧalyǧymen ötken keŋes barysynda aityldy, dep jazady "Adyrna" ūlttyq portaly.
Jaŋa oqu jyly dästürlı formatta ötedı dep josparlanuda. Soǧan bailanysty studentter jataqhanasy tapşylyǧy boluy mümkın. Būl mäsele äsırese köptegen ırı joǧary oqu oryndary şoǧyrlanǧan megapolisterde özektı.
"Ǧylym jäne joǧary bılım ministrlıgı oblystardyŋ basşylarymen jäne Nūr-Sūltan, Almaty, Şymkent qalalarynyŋ äkımderımen bırlesıp, 10 tamyzǧa deiıngı merzımde studentter jataqhanalarynda oryn beru josparyn äzırlep, bekıtuı qajet. Sondai-aq densaulyq saqtau ministrlıgımen bırlesıp, bılım beru obektılerıne qoiylatyn sanitarlyq-epidemiologiialyq talaptarǧa özgerıster engızu qajet", - dep atap öttı premer-ministrdıŋ orynbasary Eraly Toǧjanov.
Osyǧan bailanysty ǧylym jäne joǧary bılım ministrı Saiasat Nūrbek JOO rektorlaryna barlyq jataqhanaǧa tekseru jürgızıp, tösek-oryn sanyn arttyru boiynşa ūsynystar äzırleudı tapsyrdy. Būl şara qazırgı ahualdy anyqtap, studentterge uaqytşa tūrǧyn üi salu josparlaryna tüzetuler engızuge mümkındık beredı. Ministr universitetterge jaqyn ornalasqan jataqhanalar men qonaqüiler (hostelder) arasynda memorandum jasau täjıribesın keŋınen qoldanu qajettıgın de atap öttı. Sondai-aq jiynda memlekettık-jekemenşık ärıptestık aiasynda jataqhana salu jobalaryndaǧy qaǧazbastylyqty joiu mäselelerı de talqylandy.
Aita keteiık, 2022 jyly 10 myŋ orynǧa arnalǧan 35 jataqhanany paidalanuǧa beru josparlanǧan. 2018 jyldan bastap 2021 jylǧa deiın barlyǧy 30 630 orynǧa şaqtalǧan 124 nysan ıske qosyldy. Onyŋ ışınde 2021 jyly 10 364 orynǧa eseptelgen 49 ǧimarat paidalanuǧa berıldı.
"Adyrna" ūlttyq portaly
