Svetlana Nazarbaevǵa tıesili «Dáýir» polıgrafııalyq baspa kesheni memlekettik satyp alý boıynsha tapsyrys alýdy jalǵastyryp keledi. Bul týraly Halyq Uni. jarııalady, dep habarlaıdy “Adyrna” ulttyq portaly.
Qamaýdaǵy Nazarbaevtyń nemere inisi Qaırat Satybaldynyń anasy Svetlana Nazarbaevaǵa Qazaqstandaǵy baspalar arasynda monopolıske aınalǵan «Dáýir» baspasy tıesili.
“Memlekettik satyp alý portalyndaǵy aqparatqa súıensek, baspa aqpannan bir kózden satyp alý ádisi arqyly beri birneshe tapsyrys alyp keledi.
Máselen, bıyl aqpanda «Alatau Akparat» JShS-men jalpy quny 12 mln teńgeden asatyn eki kelisimshart jasasqan”, delingen aqparatta.
Aıta keteıik, Qaırat Satybaldy 13 naýryz kúni ustalǵan bolatyn. Ol «Qazaqtelekom» AQ qomaqty qarjysyn jymqyrdy jáne qyzmettik ókiletin asyra paıdalandy degen kúdikke ilingen. Tergeý 24 tamyz kúni aıaqtaldy.
“Anasy Svetlana Nazarbaevaǵa tıesili «Dáýir» baspasy Qaırat Satybaldy tergeýde jatqan kezde de, ıaǵnı naýryzdyń 31-i kúni quny 61 mln teńge bolatyn taǵy bir tapsyrys alǵan.
Tapsyrys berýshi – «Alatau Akparat» JShS. Dál osy kompanııamen 5 mamyr kúni kelisimshartty taǵy jalǵastyrǵan. Bul kelisimshart quny – 53 mln teńgege jýyq.
Tehnıkalyq sıpattamasynda baspanyń «Vechernıı Almaty» jáne «Almaty aqshamy» gazetterin basyp shyǵarý úshin gazet qaǵazyn jetkizýge jáne qoımadan Almatyda ornalasqan baspahanaǵa jetkizý kerek dep kórsetilgen” delingen habarlamada.
Sonymen qatar, «Dáýir» baspasy maýsym aıynda Mádenıet jáne sport mınıstrliginiń tapsyrysymen taǵy birneshe lottyń jeńimpazy atanǵan.
“Qoǵamdyq mańyzy bar ádebıetti basyp shyǵarý jáne taratý boıynsha qyzmet kórsetýge jasalǵan úsh kelisimsharttyń jalpy quny – 48 mln 810 myń teńge bolady. Tehsıpattamasynda kórsetilgendeı, baspa barlyǵy 8 qalamgerdiń kitabyn basyp shyǵarý jáne kitaphanalarǵa taratý qyzmetin iske asyrady. Al shilde aıynda baspa men mınıstrlik taǵy birneshe tapsyrysty oryndaýǵa kelisimshart qurǵan. 4 kelisimsharttyń jalpy quny – 111 mln teńgeden asady. Munda da qoǵamdyq mańyzy bar ádebıetti basyp shyǵarý jáne taratý boıynsha barlyǵy 33 qalamgerdiń kitabyn basyp shyǵarady” dep jazdy portal.
Halyq Uni esebinshe, bıyldyń ózinde qańtar-tamyz aralyǵynda Svetlana Nazarbaevaǵa qarasty qos kompanııa jalpy quny 1 392 810 000 teńgeniń memlekettik tapsyrysyn alǵan.
Osylaısha, Qaırat Satybaldy qamaýda otyrǵanymen, otbasynyń júrip-turýyna ketetin shyǵynyn memlekettik tapsyrystar arqyly óndirip otyrǵan.
“Adyrna” ulttyq portaly
