Rýh músini

3821
Adyrna.kz Telegram
Kózi ushynda salýaly, baısaldy kósh naıqalyp,
Bolmysynan sóz búrlep, samaıynan oı tamyp.
Otyr tórde qazaqtyń rýhyn artqan alǵadaı,
Ótý qandaı mártebe qazaqpyn dep aıta alyp!
Qabaǵynda sýyq sus, kózderinde alyp kek,
Otyr tórde has uzan shuǵylaly jaryq bop.
Ár sózine qaraýyl qoıyp sóıler dilýar,
Aıtsa Aqańdy jarasar bir ózin – bir halyq dep.
Kúıi jupar boılaýyq Saryarqanyń samaly,
Áni jýsan burqyrap, qom sýlardaı qoǵaly,
Keýdesi – uly sahara ústindegi kúmbezder,
Iyqtary – ór taýlar, han Keneniń qamaly.
Ýaqyt – onyń ishinde,
Dala – onyń jadynda,
Namysy – almas kók súńgi naızasynyń sabynda!
Kókte Kúnge,
Jerde elge
qanbaı ótken meıiri,
Bir kósh toqtap turǵandaı Imanaqtyń mańynda...
Keńistikke súıegen alyp basy – alyp tór,
Alyp tórdiń aldyna alasarmaı baryp kór.
Aqań súrgen dáýrendi
súre alsań er súrip kór,
Aqań salǵan "Dáýren-aı"
shamań jetse salyp kór!
Otyrysy – bir dáýir,
otyrysy – bir ǵalam,
Eńkeımegen,
Shókpegen,
muqalmaǵan,
synbaǵan,
Otyr ulttyń ustyny tereń oıdyń qoıynynda,
Shıyr-shıyr ájimi – qazaq ótken shyrǵalań.
Otyr ardyń aınasy,
otyr rýhtyń músini,
Oıy zil de sózi mir,
izi týra,
isi iri.
Otyr abyz,
kemeńger,
otyr batyr,
qamshyger,
Jep qoıardaı mysymen qarapaıym kisini.
Sózderiniń sáni oıý mánge qanyq ár órnek,
Jan – máńgilik,
Dil – azat,
ólse ǵapyl tán ólmek...
Sóz alǵaly otyr ol shyǵý úshin minberge,
Bar adamzat qazaqtan taraıtynyn dáleldep!
Mıras ASAN,
"Adyrna" ulttyq portaly
Pikirler