Qazaq tılınde aqparat taratudy syrtqa ysyryp, ana tılınde söileuge qorsynǧan sportşylardyŋ qylyǧy köpşılıktı qapalandyrdy. Būl turaly jurnalist Aslan Qajenov jazdy, dep habarlaidy "Adyrna" ūlttyq portaly.
"Nizkii postupok jasap keldım... Bügın otandyq sporttyŋ yǧai men syǧailary elordada bas qosyp, bırlesken brifing ötkızdı. Qasym-Jomart Toqaevtyŋ Prezident sailauyna tüsuın qoldau maqsatynda. Menıŋ aşyndyrǧany - bylai qarasaŋ jinalǧandardyŋ 98 prosentı qazaq. Bıraq, jiyn 98 prosent orysşa öttı. Eŋ soŋynda Daniiar Eleusınov qana qazaqşa qysqaşa alǧysyn aitty. Al, negızgı baiandama basqa tılde. Äsırese, ülgı tūtyp jürgen aǧalarymyz qinalyp tūryp orysşa sairaǧanda, kırerge tesık tappai qaldym. Jaraidy, jiyn osylai öttı, bıttı, kettı", - dep habarlady jurnalist.
Keiınnen Aslan Qajenov oqiǧanyŋ jelısın oqyrmandaryna tüsındırdı.
"Artynan «nege qazaqşa aqparat bermeisızder?» dep, ūiymdastyruşylardyŋ mazasyn alyp jürsem, būryşta otyrǧan İlia İlin «senıŋ jasap jürgenıŋ nizkii postupok» deidı. Ana jerde qan basqa şapty. Men öz elımde öz tılımde aqparat ala almai auzym ūrylyp tūrǧanda maqtauly auyr atletımız osylai sözben perıp qaldy. Ne degen sorlymyz? Jalpy, otandyq sportta būndai jaǧdai jiı kezdesedı. Şydam şegıne jetkesın şyryldap jatyrmyn. Prinsiptı türde qazaqşa söilemei, «al, ne ıstei alasyŋ?» degen kezder boldy. Anau-mynau sportşylar emes. El biudjetınen jyl saiyn jüzdegen million teŋge bölınetın, solar uaiymdamasyn, solar qinalmasyn dep, barlyq jaǧdaiy jasalatyn sportşylar. Olardy bükıl halyq qoldap-qolpaştaidy. Jetıstıkterıne quanady. Bıraq, myna jaqta ne byqsytyp jürenderın bılmeidı ǧoi. Bılse, «aiyryp» jıberetın edı. Tılge tükırgenı bır mysal. Odan bölek änūrandy jatqa bılmeidı. Jarystarǧa kök bairaǧymyzdy aparmaidy. Keiın solardy talap etseŋ, nizkii postupok jasaǧan bolyp şyǧasyŋ..." - dedı aşynǧan avtor.
Ūqsas jaŋalyqtar
