«Qoǵamdyq kelisim» KMM Qazaqstan halqy Assambleıasynyń aqparattyq- nasıhattaý toby QR Prezıdenti Q.Toqaevtyń Qazaqstan halqyna Joldaýyn halyqqa túsindirý jumystaryn júrgizýde. Qazannyń besi kúni aqparattyq-nasıhat toby qaladaǵy «AIaZ» JShS ujymymen kezdesti.
BQO QHA Qoǵamdyq kelisim keńesiniń tóraǵasy Amangeldi Davletjanov pen etnomádenı jáne qoǵamdyq birlestikter jumysy boıynsha bólim basshysy Inessa Toboleva seriktestik jumysshylarymen júzdesip, Prezıdent ataǵan kóptiń kókeıinde júrgen ózekti máselelerdi sheshýdiń joldaryn jetkizdi.
– Memleket basshysy Q.Toqaev óz Joldaýynda kóptegen másele kóterdi. Joldaýda Jańa qazaqstan bolashaqta qaı baǵytqa bet buratyny týraly naqty aıtyp, osy baǵytta naqty mindetter qoıdy. Budan buryn Qoǵamdyq keńestiń úlken jıyny ótip, oblystyq Qoǵamdyq keńes músheleri jeti topqa bólinip, ár sala boıynsha túsinik jumystaryn júrgizýdi bastap kettik, onymen qatar azamattardyń turmysyn arttyryp, el ekonomıkasyna ekpin beretin baǵyttardy da aıqyndap berdi. Qarapaıym halyqtyń da kútkeni – osy, – deı kelip, Joldaýdyń negizgi baǵyttaryna toqtaldy.
Óz kezeginde «AIaZ» JShS dırektory Amangeldi Ermekqalıev qazirgi tańda jeńil ónerkásippen aınalysatyn otyzdan asa jumysshysy bar seriktestiktiń tolǵaqty máseleleri týraly ashyp aıtty. Amangeldi Shmanǵalıulynyń aıtýynsha, búginde aýyldaǵy aǵaıyn tórt túligin kóbeıtti. Degenmen, turǵyndar baǵyp otyrǵan malynyń etin ǵana saýdalaıdy. Maldyń terisi, qoıdyń júni ondaǵan jyldan beri kereksiz taýar bolyp qalǵan. Aýyldaǵy mal baqqan aǵaıyn jylyna eki ret qyrqyp alatyn qoıynyń júnin dalaǵa tastaıdy. Sebep bireý – jún alatyn oryndar joq, bolsa da jún baǵasy óte arzan. Qalaǵa alyp kelip, tapsyrǵan ýaqyty men shyǵynyna turmaıdy. Mal terisi de solaı – soǵym naýqanynda sıyr terisi saýdalanatyny bolmasa, qalǵan teriniń qyzyǵyn ıt-qus kórip jatyr. Sondyqtan qaıta óńdeý kásipornyna shıkizat qat. Salany damytý úshin jańa baǵdarlama qajetin qansha jyldan beri másele etip kóterip júrgenimen esh nátıje joq.
Ónimderin elimizden bólek, alys-jaqyn shetelderge taratyp kelgen baıyrǵy mekemeniń qazirgi jaǵdaıyn baǵamdaǵan Qoǵamdyq kelisim keńesiniń tóraǵasy Amangeldi Davletjanov Úkimet tarapynan arnaıy baǵdarlama keregin aıtyp, máseleni quzyrly organdarǵa jetkizetinin aıtty.
