Ūlttar bırlıgı – ūly bailyq

Qazaqstan halqynyŋ tılderı künı merekesı qarsaŋynda QR Ūlttyq kıtaphanasynda «Ūlttar bırlıgı – ūly bailyq» atty şyǧarmaşylyq festival ūiymdastyryldy. Atalǧan ıs-şarany «Adyrna» ūlttyq-etnografiialyq bırlestıgı Qazaqstan halqy Assambleiasymen bırlese otyryp Almaty qalasy Işkı saiasat basqarmasynyŋ qoldauymen ötkızdı. Qazaqstan halqynyŋ bırlıgı ūrany negızınde «Bırlık – bereke bastauy» atty jobanyŋ aiasynda ötken festival barysynda etnoauyl körmesı ūiymdastyryldy. Körmege etnomädeni ortalyqtardyŋ ökılderı ūlttyq naqyşta bederlengen būiymdaryn qoiyp, ūlttyq taǧamdaryn köpşılıkke ūsyndy. Sondai-aq, etnomädeni bırlestıkterdıŋ şyǧarmaşylyq ūjymdarynyŋ qoiylymy körsetılıp, özge ūlt jastary arasynda «Tıl – tatulyq tıregı» atty baiqau bolyp öttı. «Adyrna» ūlttyq-etnografiialyq bırlestıgınıŋ direktory Arman Äubäkırov: «Memleketımızdıŋ negızgı tıregı – qazaq ūlty. Qazaqtyŋ mädenietın, ūlttyq qūndylyqtaryn nasihattap, elımızde tūryp jatqan ūlt ökılderın qazaq etnosy aiasynda bırıktıru maqsatynda osy şara ötkızılıp otyr. Osyndai jūmystardyŋ negızınde elımızde tatulyqty, bırlıktı, dostyqty saqtai alamyz jäne bır-bırımızge degen syilastyqtyŋ, yntymaqtyŋ qalyptasuyna osyndai festivaldar, baiqaular sebepşı bolady dep oilaimyn, - dedı. Baiqaudyŋ şymyldyǧy Chaikovskii atyndaǧy muzyka kolledjı studentterınıŋ önerımen aşyldy. Saiysqa qatysuşylardy Ahmet Baitūrsynov atyndaǧy Tıl bılımı institutynyŋ direktory, filologiia ǧylymdarynyŋ doktory, qazylar alqasynyŋ töraǧasy Erden Qajybek qūttyqtap, sättılık tıledı. Baiqauǧa Erden Qajybek, Almaty qalasy Tılderdı damytu basqarmasynyŋ bas mamany Nūrmūha Şaimerdenov, Temırbek Jürgenov atyndaǧy Qazaq ūlttyq öner akademiiasy «Teatr önerı» fakultetı, «Sahna tılı» kafedrasynyŋ dosentı Aigül Naremgenova, «Ūlan» gazetınıŋ bas redaktory Jadyra Narmahan, «Qamşy» aqparattyq agenttıgınıŋ jetekşısı Bıläl Quanyş törelık ettı. Saiysqa özbek, orys, türıkmen, auǧan, täjık, kürd, ūiǧyr, türık, nemıs ūltynan 15 pen 30 jas aralyǧyndaǧy 10 talapker qatysyp, 3 kezeŋ boiynşa synǧa tüstı. Bırınşı kezeŋ boiynşa biyl 125 jyldyǧyn atap ötıp otyrǧan Alaş qairatkerı, aqyn Maǧjan Jūmabaevtyŋ ölenderın jatqa oqu, ekınşı kezeŋ boiynşa «Ūlttardy ūiystyrǧan qazaq halqy» taqyrybynda esse oqu, üşınşı kezeŋ boiynşa öz önerlerın körsetu tapsyryldy. Qatysuşylardyŋ barlyǧy memlekettık tıldı jetık bıletınderın körsettı. Qazaq tılınde taza söilep, oilaryn erkın jetkıze bılgen olar öz önerlerın ortaǧa saldy. Baiqau qorytyndysy boiynşa qazylar alqasynyŋ şeşımımen bırınşı oryndy orys ūltynyŋ ökılı, QR Ūlttyq Ūlan qyzmetkerı Aleksandr Mamykin jeŋıp aldy. Ūpai sany boiynşa alǧa şyqqan Aleksandr noutbukke ie boldy. Özbek qyzy, qazaq memlekettık qyzdar pedagogikalyq universitetınıŋ studentı Feruza Sūltanmūratova ekınşı oryndy qanaǧat tūtyp, planşet ielendı. Al üşınşı oryn türık qyzy Rusalina Asievaǧa būiyryp, fotoappa- rat berıldı. Rusalina baiqaudyŋ eŋ jas qatysuşysy boldy. Jasy nebary on beste. 9-şy synypty qyzyl attestatpen aiaqtap, 10-şy synypqa köşıptı. Almatydaǧy №22 mekteptıŋ qazaq synybynda oqidy. Anasy Farida Asieva qyzyn alǧaşynda orys mektebıne bergenın aitady. Alaida Rusalina qazaqşa oqitynyn aityp, qiǧylyq salǧan soŋ qazaq synybyna auystyrǧan eken. Sodan berı türık qyzy türlı baiqaularǧa qatysyp, top jaryp keledı. Özınıŋ ana tılımen qosa qazaq, orys, aǧylşyn tılderınde erkın söileidı. «Mektepte alǧan bılımım, ata-anamnyŋ bergen tärbiesı, atamnyŋ önegelı aqylynan menıŋ elıme degen süiıspenşılıgım arta tüstı. Osynda tuyp-öskenıme, memlekettık tılde söilep, bılım alyp jatqanyma maqtanamyn. 9-şy synypty altyn attestatpen bıtırgenıme quanamyn jäne 11-şı synypty da «Altyn belgıge» bıtırıp, Astanadaǧy Nazarbaev universitetınde bılım närımen susyndap, elıme paidasy tietın mamandyq iesı bolǧym keledı. Otanymyz – Qazaqstannyŋ ärdaiym bırlık pen tynyştyqta ömır sürgenın qalaimyn», - dedı Rusalina Alieva. Baiqauǧa qatysqan barlyq qatysuşylar alǧys hatpen jäne baǧaly syilyqtarmen marapattaldy. Is-şaraǧa Qazaqstan halqy Assambleiasynyŋ müşelerı, ūlttyq intelligensiia, BAQ ökılderı, studentter men oquşylar qatysty. Aina TÖLEUTAEVA