Vashıngtonda Muhtar Áýezovtiń shyǵarmashylyǵy nasıhattaldy, dep habarlaıdy “Adyrna” ulttyq portaly.
Kórnekti qazaq jazýshysy Muhtar Áýezovtiń týǵanyna 125 jyl tolýyn merekeleý aıasynda Qazaqstannyń AQSh-taǵy elshiligi Djordj Vashıngton ýnıversıteti janyndaǵy Abaı ortalyǵymen birlesip, klassıktiń shyǵarmashylyq murasyn talqylaýǵa arnalǵan onlaın dóńgelek ústel uıymdastyrdy.
Is-sharanyń negizgi maqsaty – jazýshynyń taǵylymyn jáne oı-talǵamdaryn keńinen dáripteý arqyly qazaq halqynyń mádenıeti, rýhanı óresi men ulttyq qundylyqtaryn nasıhattaý.
Dóńgelek ústelge qatysqan Qazaqstan men AQSh-tyń akademııalyq qaýymdastyqtarynyń ókilderi qazaq jazýshysynyń ǵylymı-shyǵarmashylyq murasyn talqylap, onyń qazirgi álemdegi ózektiligin atap ótti.
Is-sharany asha otyryp, Qazaqstan elshisi Erjan Ashyqbaev M.Áýezovtiń qazaq ádebıetiniń damý tarıhyna qosqan zor úlesin atap ótti. Sondaı-aq sheteldik jas ádebıettanýshylar men tyńdaýshylardy jazýshynyń shyǵarmashylyǵyn ári qaraı zertteýge shaqyrdy.
Talqylaýǵa M. Áýezov atyndaǵy Ádebıet jáne óner ınstıtýtynyń bas dırektory Kenjehan Matyjanov, M. Áýezov murajaı-úıiniń dırektory Dıar Qonaev, Ankara Hajy Baıram Velı ýnıversıtetiniń oqytýshysy Gúljanat Qurmanǵalıeva-Erjılasýn, Djordj Vashıngton ýnıversıtetiniń Slavıan tilderi, kınotaný jáne halyqaralyq qatynastar bóliminiń professory Peter Rollberg, ál-Farabı ýnıversıtetiniń professory Qanıpash Mádibaeva, jazýshy Nurbolat Aqysh jáne fılologııa ǵylymdarynyń doktory Alýa Temirbolat qatysty.
Pikir almasýdyń moderatory retinde Djordj Vashıngton ýnıversıteti janyndaǵy Eýropalyq, reseılik jáne eýrazııalyq zertteýler ınstıtýtynyń (IERES) dırektory Marlen Larýel boldy.
