Tanymal jýrnalıst, ulttyq radıomyzdyń maıtalmany Janar Orazymbet óziniń feısbýk paraqshasynda qundaqtaǵy bala tárbıesine qatysy keńes aıtyp, onyń boıyna ulttyq qundylyqtardy sińirý erekshelikterimen bólisti. Bul jaıly "Adyrna" ulttyq portaly jazdy.
"Qazaq", "Shalqar" radıosynda ulttyq rýhanııatymyz, tarıhymyz ben tilimiz jaıynda birqatar habarlardy tizgindep kele jatqan jýrnalıst Janar Orazymbet bala tiliniń qazaqsha shyǵýy men ulttyq qundylyqtar jeteginde tálim-tárbıe alýyna baılanysty qyzyqty oqıǵasymen bólisti.
- Meniń nemeremniń qulaǵyna qazaqsha án men kúıdi sińire bersem degen nıetim azdap bolsa da júzege asa bastaǵan sııaqty. Týa salǵannan "Bala-bala baladan, taýyp alǵan daladannan" bastap birtalaı halyq ánderin aıtyp, áldıledim. Nemerem emhanada jatqan ǵoı. Vıdeo arqyly habarlassam, "Qoshaqanym, qadasyń?" dep saırap tur. Oryssha, aǵylshynsha mýltık kóretin balalar qazaqsha án aıtpaıdy dep kim aıtty, al?! Qulaǵyna quıa berseń, aıtady eken. Kórdińizder me, tipti, tili áli anyq shyqpaǵan Alan án aıta bastady ǵoı. Bul ǵana emes, onyń repertýarynda taǵy birneshe áni bar, - dep jazdy avtor.
Janar Orazymbettiń paıymdaýynsha, ulttyq radıomyzdaǵy habarlardy tyńdap ósken bala da ultyn sheksiz súıer azamat bolyp jetiledi. Buǵan qatysty:
- Qysqasy, Shalqardy tyńdap júrseńizdershi....Lajy bolmasa, kólikte qosyp qoıyńyz. Eń bolmasa, qulaǵynda qalady ǵoı. Qazaqtyń sózi, úni, áýeni, - dedi radıojýrnalıst.
"Adyrna" ulttyq portaly
