Almaty qalasyndaǧy Dostyq üiınde Qazaqstan Täuelsızdık künıne arnalǧan döŋgelek üstel öttı. Būl ıs-şarany «Adyrna» ūlttyq-etnografiialyq bırlestıgı ūiymdastyrdy. Almaty qalasynyŋ Işkı saiasat basqarmasy qoldauymen ıske asqan şaranyŋ tärbielık mänı öte zor boldy.
Jiynda qazaqtyŋ belgılı tarihşylary Hangeldı Äbjanov, Talas Omarbekov syndy tarihşylar, halyqqa tanymal öner iesı Tūŋǧyşbai Jamanqūlov jäne 1986 jyly KSRO Ortalyq komitetınıŋ Qazaqstannyŋ basşylyǧyna Reseidıŋ bır oblysynyŋ qatardaǧy basşysyn Qonaevtyŋ ornyna alyp kelgenıne qarsylyq bıldırıp Almaty qalasynyŋ bas alaŋyna beibıt şeruge şyqqan sol kezgı jastardyŋ bügıngı ökılderı men qoǧam qairatkerlerı jäne studentter, mektep oquşylary, ūzyn sany jüz adamnan asa azamattar qatysty.
Jiyndy tarih ǧylymdarynyŋ doktory Hangeldı Äbjanov jürgızıp otyrdy. Alǧaşqy söz sol bır saiasattyŋ qylyşynan qan tamyp tūrǧan kezde totalitarlyq jüiege qarsy qamyqpai alaŋǧa şyqqandardyŋ bırı Tūŋǧyşbai Jamanqūlovqa berıldı. Qazaqtyŋ betke ūstar azamattarynyŋ bırı sol kez turaly estelıkterın ortaǧa sala otyryp Qazaqstannyŋ bügıngı kezgı jaǧdaiy, jastardyŋ otanşyldyǧy turaly äŋgımeledı.
Talas Omarbekov öz kezegınde qyzyqty tarihi derekterdı keltırdı. Sonyŋ bırı türkı älemınıŋ belgılı ziialylarynyŋ bırı Zäki Uälididıŋ başqūr halqyna jazǧan haty turaly. Z.Uälidi tuǧan halqyna sol bır ündeuınde qazaq ūltymen bırge boluǧa şaqyrypty. Bolaşaqta qazaqtar öz täuelsızdıgın alatynyn, sondyqtan qazaqtardan ajyramaŋdar dep jazǧan eken. Tarihşy būdan basqa da türlı derektermen bölıstı.
Tarihqa ainalǧan sol bır yzǧarly jeltoqsan künderı jas qyzdar men jıgıtter, büngıngı saliqaly aǧalar men apalar kezegıme söz alyp sol künderı KSRO qaruly küşterınıŋ özderıne körsetken zorlyq-zomblyqtary aşy şyndyqty jaiyp saldy.
Şeşenderge kezegımen söz berıp otyrǧan H.Äbjanov är sözge jüielı tolyqtyrular men tüiındemeler aityp otyrdy.
Sözjarysqa bügıngı jastardyŋ ökılderı – mektep oquşylary men student jastar da qatysty.
«Adyrna» ūlttyq-etnografiialyq bırlestıgı būndai jiyndardy kelesı jyly da ötkızudı josparlap otyr.
