Senat Töraǧasy Mäulen Äşımbaev Qazaqstan Prezidentın saltanatty ūlyqtau räsımı turaly öz pıkırın bıldırdı, dep jazady "Adyrna" ūlttyq portaly.
"Memleket basşysy özınıŋ jetı jyldyq qyzmetıne resmi türde kırıstı. Būl elımızdıŋ saiasi ömırındegı aituly oqiǧa ekenı sözsız. Ötken sailauda azamattarymyz Qasym-Jomart Kemelūlyna zor senım bıldırıp, ädılettılıkke taban tıreitın memleket, ekonomika jäne qoǧam qūru baǧdarlamasyn qyzu qoldaǧany belgılı. Prezidentımız ūltymyzdyŋ osy ümıtın aqtau özınıŋ aldaǧy basty mındetı bolatynyn jariialady. Sonymen qatar, sailau aldynda berılgen uädelerdı ıske asyruǧa jol aşatyn bastapqy ärı naqty jūmys baǧdarlaryn aiqyndap körsettı. Prezidentımız öz sözınde zaŋ aldynda bärınıŋ teŋ boluy – memleketımızdıŋ ūzaq merzımdı damuynyŋ negızgı şarty ekenın qadap aitty. Osy jolda elden zaŋsyz şyǧarylǧan barlyq aktivtı elge qaitaru maŋyzdy mındetke ainaluda", - dep jazdy Mäulen Äşımbaev.Būl üşın zaŋsyz şetel asqan kapitaldy qaitaruǧa qajettı räsımderdı retteitın zaŋ jobasy äzırlenetının jetkızdı.
"Sondai-aq Prezidentımız öŋırlerdı, onyŋ ışınde auyldarymyzdy örkendetuge airyqşa köŋıl bölıp otyr. Osyǧan bailanysty Qasym-Jomart Kemelūlynyŋ jaŋa prezidenttık merzımdegı bırınşı Jarlyǧy auyldy damytu mäselesın şeşuge arnaldy. Sonymen bırge auqymdy industriialandyru, infraqūrylymdardy salu jäne jaŋǧyrtu ısı de tyŋ serpınmen qolǧa alynady. Memleket basşysy öz sözınde Konstitusiiaǧa säikes bilık tarmaqtary tügel jaŋǧyrtylatynyn aitty. Osyǧan säikes aldaǧy jyldyŋ 14 qaŋtarynda Senat deputattarynyŋ sailauy ötedı. Būl bızdıŋ deputattyq korpustyŋ sapalyq tūrǧydan özgerıp, öz jūmysyn jaŋa mındetter aiasynda laiyqty jalǧastyruyna mümkındık beredı. Ädılettı Qazaqstandy qūru – barşamyzdyŋ ortaq maqsatymyz. Osy jäne alda jariialanatyn basqa da bastamalar men mındetterdı zaŋnamalyq tūrǧydan sapaly ärı uaqtyly qamtamasyz etu Senattyŋ aldyndaǧy basty mındetı bolyp qala beredı",- dedı Senat Töraǧasy.
"Adyrna" ūlttyq portaly
Ūqsas jaŋalyqtar
