Olıgarh Aleksandr Klebanov ózi baqylaıtyn Ekibastuz jylý elektr ortalyǵyn apatty kúıde memleketke 1 teńgege satqysy keledi. Bul týraly májilis depýtaty Erlan Saıyrov aıtty, dep habarlaıdy “Adyrna” tilshisi.
Depýtattan májilis kýlýarynda jýrnalıster: “olıgarh Klebanovpen kezdestińiz be?”, dep surady.
"Eki kún buryn ákimshilikte jınalys boldy. Oǵan Klebanov ta qatysty. Sol kezde biz búkil suraqty sol kisige qoıdyq. Ol bizge ony (Ekibastuz JEO) 1 teńgege memleketke satýǵa daıynbyz dedi", - dedi Saıyrov májilis kýlýarynda.
Alaıda Qazaqstan bıligi oǵan kelispegen.
"Biz olaı bolmaıdy dep aıttyq. Eń aldymen kásiporyndy ıelikke alǵan kezde tozý deńgeıi qandaı, qazir qandaı, sol aıyrmany anyqtap, sony tóleýdi talap ettik. Ekinshiden, qazir Qazaqstan halqy qınalyp jatyr. Sondyqtan olar Ekibastuz halqyna moraldyq shyǵyn tóleýi kerek", - dedi májilismen.
27 qarashaǵa qaraǵan túni Ekibastuz JEO-da qazandyqtar isten shyǵyp, turǵyndar qaqaǵan aıazda jylýsyz qaldy. Ertesine qalada tótenshe jaǵdaı jarııalandy.
Aıta keteıik, olıgarh Aleksandr Klebanov – "Ekibastuzjylýenergııa" JShS quryltaıshysy.
