Prezıdent Qasym-Jomart Toqaev 2025 jylǵa deıin el aýmaǵynda 1000 mektep salýdy tapsyrǵan edi. Memleket basshysynyń pármeni Almaty qalasynda josparǵa sáıkes oryndalý ústinde. Alaıda, bilim oshaǵyndaǵy oryn tapshylyǵy áli kúnge túıini tarqatylmaǵan jaıt bolyp otyr. Bunyń ońtaıly sheshimi sý jańa bilim uıasynyń irgesin qalaý. Bul týraly Almaty qalasynyń ákimi Erbolat Dosaev Túrksib aýdanynyń turǵyndarymen kezdesý kezinde aıtty, dep jazdy «Adyrna» tilshisi.
Jalpy, Túrksib aýdanynda 1 970 oqýshy orny tapshy. 2022 jyldyń jeltoqsan aıynda mekteptiń qýatyn 900 oqýshy ornyna deıin arttyratyn № 59 mektep-gımnazııa ǵımaratyna (Saýranbaev kóshesi boıynda) qosymsha qurylysty sala otyryp, rekonstrýkııalaý bastalady.
«Buryn aıtqanymdaı, kelesi jyly 1050 oryndyq eki qosymsha qurylys (№195 - 450 oryn, №198 - 600 oryn) júrgizýdi bastaımyz. Qazir jobalaý-smetalyq qujattamasy ázirlenip jatyr. 2023 jyldyń maýsym aıynda aıaqtalady», - dedi qala ákimi Erbolat Dosaev.
Sondaı-aq mektepke deıingi uıymdardy jóndeý jáne salý jumystary sheńberinde №70 arnaıy bóbekjaı-balabaqsha ǵımaratyn seısmıkalyq kúsheıtý jalǵasýda, jumystar 2023 jyldyń naýryz aıynda aıaqtalady.
Qurylys materıaldary baǵasynyń qymbattaýyna, jumysyn adal atqarmaıtyn merdigerlerdiń kóbeıýine baılanysty «Jas Qanat» shaǵynaýdanyndaǵy 280 oryndyq balabaqshany salý jumystary toqtatyldy. Qurylysty 2023 jyldyń III toqsanynda bastaý josparlanǵan.
2023 jyldyń qańtar aıynda «Qaırat» shaǵynaýdanynda 260 oryndyq balabaqshanyń qurylysy bastalady.
