Qoǵam belsendisi Sholpan Ǵabbasova Qazaqstan halqy assambleıasynyń qyzmetine qatysty azamattyq pikir bildirdi. Avtordyń aıtýynsha, assambleıa ókilderi Qazaq eliniń basyna túsken syn shaqtarda buǵyp qalyp, qazaq tili men qazaq topyraǵyna qatysty tartysty taqyryptarda jumǵan aýzyn ashpaı keledi, dep jazdy "Adyrna" ulttyq portaly.
Feısbýk áleýmettik jelisinde Sholpan Ǵabbasovanyń assambleıaǵa qatysty azamattyq pikiri tarady. Qazaq eli azamattarynyń deni assambleıanyń taratylýyn qalaıdy. Bul jaıly avtor:
- Assambleıanyń qurylǵannan bergi jumysy nól dep esepteımin. Assambleıa etnostary ózderin, óz tilderi men salt-dástúrlerin, mádenıetin jarnamalaýmen ǵana aınalysty. Árıne, qazaq retinde ol maǵan qyzyq. Biraq, Qazaqstandaǵy eshbir etnos óz etnosy ishinde qazaq tarıhyn, tilin, saltyn ulyqtaýǵa, qazaq ultynyń memleketti quraýshy ult ekenin, eldiń de, jerdiń de ıesi qazaq ulty ekenin moıyndaýǵa, Qazaqııada qazaqtar ana tilinde jaýap alýǵa, ana tilinde qyzmet kórsetýin talap etýge quqyqty ekenin moıyndaýǵa jumys júrgizbedi. Ulttar birligi men ózara sılastyǵyn arttyrýda rol atqarmady, Jambyl oblysyndaǵy, Qaraǵandydaǵy, t.b. jerlerdegi qaqtyǵystarda araaǵaıyn bola almady. Orys etnosynyń ókilderi qazaqtyń tarıhyn joqqa shyǵaryp, dombyrasyn syndyryp, qazaq ultyn qorlaıtyn, terrıtorııalyq tutastyǵyna qatysty arandatý sózderin aıtyp jatqanda jumǵan aýyzdaryn ashpady. Tentekterin tártipke shaqyryp, qylmystyq jaýapkershilikke tartylýyn talap etpedi. Reseı sheneýnikteri men saıasatkerleriniń Qazaqstan jaıly negizsiz qorlaý, aıyp sózderin estı otyra únsiz qaldy.Qazaqstanda qazaq tiliniń problemasy bar ekenin bile otyra QHA «Joq, bizdiń Qazaqstanda 2023 jyl Qazaq tili jyly bolsyn, orys tili jyly bolýyna qarsymyz. Qazaq tiline qoldaý kerek» dep aıta ala ma eken?Sondyqtan assambleıanyń jumysyna beretin nól degen baǵam oryndy dep oılaımyn jáne halyqtyń aqshasynan-bıýdjetinen bólinip otyrǵan qarajatty únemdeý úshin QHA taratylsyn degen talapqa qosylamyn, - dep pikir bildirdi.
Oraıy kelgende aıta keteıik, Qazaqstan halqy Assambleıasy 1995 jylǵy 1 naýryzda Qazaqstan Respýblıkasynyń Prezıdentiniń Jarlyǵymen qurylǵan Memleket basshysy janyndaǵy konsýltatıvti-keńesshi organ. Negizinen alǵanda, olardyń basty maqsaty memlekettiń shańyraǵyn kótergen negizgi ulttyń, qazaqtyń, tóńiregine toptasý. Ulttyq saıasat men ulttyq múddeniń júzege asýyna qyzmet etý, qoǵamda etnıkalyq dúrdarazdyqtyń týmaýy úshin tıimdi saıasat júrgizý bolyp sanalady.
"Adyrna" ulttyq portaly
