Taldyqorǵan qalasyndaǵy Nazarbaev Zııatkerlik mektebinde jańa jyldyq «Meıirimdilik shyrshasy» ótti. Bul kún «Aınalaıyn» balalar úıiniń tárbıelenýshileri, Shymyr aýylynyń balalary úshin naǵyz sıqyrly merekege aınaldy. Mekteptiń ózin-ózi basqarýy men oqýshylardyń ata-analary búldirshinderdi jyly lebizimen quttyqtap, jańa jyldyq táttilerdi tabys etti.
NIS oqýshylary kóńildi saıystar, estafetalar jáne qyzyqty oıyndar daıyndady. Ár bala taqpaq, kóńildi án aıtyp, bı bıledi.
[caption id="attachment_142774" align="aligncenter" width="2560"]
SONY DSC[/caption]
«Aınalaıyn» balalar úıiniń tárbıelenýshisi Sanat Sherýbaev úshin «Jańa jyl» eń súıikti merekelerdiń biri. Rasynda da, bul kúni úlken-kishiniń bári tilek aıtyp, ǵajaıyptan úmit kútedi. Sanat №16 orta mekteptiń 7-synyp oqýshysy, onyń armany – úlken otbasy, úlken úı. «Men óskende aspazshy bolǵym keledi, dámdi tamaq ázirlep, bárine dám tatqym keledi», — deıdi jas keıipkerimiz.
Óz kezeginde «Aınalaıyn» tárbıelenýshileri uıymdastyrylǵan merekege úlken rızashylyqtaryn bildirip, Zııatkerlik mektebiniń dırektory Vıktor Sosın men «Qamqor» áleýmettik jobasynyń úılestirýshisi Janar Orazbaevaǵa óz qoldarymen jasaǵan syılyqtaryn tabys etti.
Bul kúnderi biz ótip bara jatqan jyldy shyǵaryp salýdamyz. Barlyǵymyz úshin 2022 jyl ońaı bolǵan joq. Desek te, jetken jetistikter de, az emes. Aldaǵy oqý jyly barlyq oqýshylarǵa, búkil mektep ujymyna munymen toqtap qalmaı, budan da joǵary nátıjelerge umtylýlaryna tilektespin, – deıdi mektep dırektory Vıktor Sosın.
Kóńildi jáne merekelik kóńil-kúı tolqynynda Taldyqorǵandaǵy NIS oqýshylary kele jatqan Jańa 2023 jyldy qarsy alýda.
