"Mınıstrlerdiń óńirlerge saparynan halyq kóbinese habarsyz qalady". Bul pikirdi búgin Úkimet otyrysynda QR Aqparat jáne qoǵamdyq damý mınıstri Darhan Qydyráli málim etti, dep jazady "Adyrna" ulttyq portaly inbusiness.kz-ke silteme jasap.
"2022 jyldyń qorytyndysy boıynsha mınıstrlerdiń halyqpen kezdesýin taldaý jumystary myna máselelerdi kórsetti. Mınıstrlerdiń óńirlerdegi halyqpen kezdesýindegi mańyzdy sharalar: kezdesýlerdi jarııalaý, máselelerdi aldyn ala jınaqtaý, brıfıngter, azamattardy jeke qabyldaý, kommerııalyq emes uıymdarmen kezdesýler jáne problemalyq máseleler boıynsha is-qımyl josparyn daıyndaý. Keıbir ortalyq atqarýshy organdar atalǵan talaptardy tolyq saqtamaǵany anyqtalyp otyr", – degen mınıstr naqty sandarǵa toqtaldy.
Onyń aıtýynsha, 2022 jyly kóshpeli kezdesýler aıasynda mınıstrler 216 jeke qabyldaý ótkizip, 1498 azamattyń aryz-shaǵymyn tyńdaǵan.
"Kezdesýde 1679 problemalyq másele kóterilip, onyń 1241-i nemese 74%-y sheshildi. Al 438-i memlekettik organdardyń oryndaýynda. Atalǵan is-sharalardyń oń áseri men nátıjeli bolǵanyn atap ótkimiz keledi. Máselen, Oqý-aǵartý mınıstriniń halyqpen kezdesý qorytyndysy boıynsha, memlekettik mektepterde oqýshylardy tamaqtandyrý qaǵıdalaryna ózgerister engizildi", – dedi mınıstr.
Sonymen qatar, Soltústik Qazaqstan oblysynda Ishki ister mınıstriniń kezdesýi nátıjesinde jergilikti sport mektebi "Dınamo" dene shynyqtyrý-sport qoǵamynyń qamqorlyǵyna alyndy.
"Bul rette, azamattar men BAQ mınıstrlerdiń óńirlerge sapary jergilikti BAQ-ta keńinen jarııalanbaıtynyn, halyqtyń kóbinese habarsyz qalatynyn eskergen jón. Kestege sáıkes, 2022 jylǵa 227 kezdesý josparlanǵan, onyń 55-i birinshi jartyjyldyqqa, 172-si ekinshi jartyjyldyqqa mejelengen. Nátıjesinde 2022 jyly (mamyr-jeltoqsan kezeńinde) barlyǵy 212 kezdesýler ótkizildi. Mınıstrlerdiń halyqpen kezdesýlerine júrgizilgen salystyrmaly taldaý jumystary ekinshi jartyjyldyqta kezdesý qarqyny 2,3 ese óskenin kórsetti", – dedi Aqparat jáne qoǵamdyq damý mınıstri.
"Adyrna" ulttyq portaly
