Birneshe jyldan beri Qostanaı avtokólik kolledji Allur kompanııasyna qajetti kadrlardy daıyndaıtyn ustahanaǵa aınalǵan. Sebebi, osy mamandyqty tańdaǵan jas daryndar bul salaǵa qyzyǵýshylyq tanytyp qana qoımaı, onyń damýyna atsalysýda. Olardyń arman-maqsaty – elordany baǵyndyrý ǵana emes, týǵan jerindegi ónerkásipti órkendetý. Al bul oqýǵa qalaı túsýge bolady, ári túlekterge arnalǵan múmkindigi qandaı? Bul týraly Qostanaı kolledjiniń 3 kýrs stýdenti Azat Ábishev aıtyp berdi.
«Kóliktegi elektr jabdyqtaryn jóndeý jónindegi elektrık mamandyǵyn oqyp jatyrmyn. Biraq mamandyǵym osymen ǵana shektelip qalmaıdy, onyń aýqymy keń. Óıtkeni bizdiń oqý baǵdarlamamyz árbir mamannyń negizgi bilimdi alyp shyǵýyna negizdelgen. Ári bilimimizdi shyńdaı túsý úshin teorııamen birge praktıkanyń bolýy da mańyzdy. Ol úshin bizge zaýyt qoldaý kórsetip, kólikter ornatylǵan kolledj zerthanalarynda tájirıbeden ótkizedi. Odan basqa, avtokóliktiń markasyna baılanysty ártúrli stendter bar. Osylaısha, tikeleı zaýyttaǵy tájirıbege aralasa otyryp, ár maman óz salasyn jetik meńgeredi. Sondyqtan bizge ony qaıta úırenýdiń qajeti joq», – deıdi stýdent.
Ol kolledjdi bitirgennen keıin óz ómirin qaladaǵy aldyńǵy qatarly ónerkásip oryndarynyń birinde jalǵastyrǵysy keledi.
– Osy jyly óndiristik tájirıbeden ótpekshimin. Sol jerde ózimdi jaqsy qyrymnan kórsetip, bilikti maman ekenimdi dáleldep, Allur zaýytynda jumysqa qalmaq oıym bar. Qazir baıqasam, óz ortamdaǵy tanystarymnyń kópshiligi osy oqý ornyna túsýdi qalaıtyn bolǵan. Sebebi, bizde tek teorııa ǵana emes, tájirıbemiz de bar. Sondyqtan zaýyttyń qoldaýynyń arqasynda kolledjimizdiń bedeli ósip, bizge túskisi keletinderdiń sany arta túsken, – dedi Azat.
Qostanaıdaǵy kólik qurylysynyń zaýytyn tehnıkalyq jaraqtandyrýdyń joǵary deńgeıde ekenin Azat atap ótti.
«Biz zaýyttyń ishin birneshe ret aralap, tanysyp shyqqanbyz. Tipti, tájirıbe ótkenimizde zaýyt óndirisiniń qanshalyqty myqty ekenine kózimiz jetken. Búginde zaýyt kóbine usaq-túıek tehnıkalalardy qurastyrady. Al bul óte qıyn proess. Oǵan qosa qalada jıi kóretin eń tanymal mashınalar dál osy jerde, Qostanaıda jınaqtalady. Jalǵyz men ǵana emes, dostarym da qaladan ketkisi kelmeıdi. Kerisinshe, óz qalamyzǵa, bizge múmkindik berip otyrǵan zaýytqa qajet ekenimizdi bilemiz, sondyqtan jańa múmkindikterge jol ashaıyq, elimizdi kórkeıteıik», – dedi Azat Ábishev.
Aıta keterlik dúnıe, tolyqqandy jumysqa turǵan stýdentter qyzmette ósip, básekege qabiletti jalaqy, tolyq áleýmettik paket, transfer jáne tegin tamaqpen qamtamasyz etiledi. Sonymen qatar, zaýyt jataqhananyń jańa formattaǵy kampýsyn salýmen aınalyspaq. Zaýyttaǵy jumys stýdentterdiń oqýyna kedergi keltirmeıdi. Zaýyttyń korporatıvtik ýnıversıtetin damytý baǵdarlamasynda óz daǵdylaryn, sonyń ishinde álemniń úzdik avtozaýyttarynda arttyrýǵa múmkindik beriledi.
"Adyrna" ulttyq portaly
