Jadyra Baıbulanova 1990 jyly 9 jeltoqsanda Qaraǵandy oblysy, Qarqaraly aýdany, Beıbitshilik aýylynda dúnıege kelgen. E.A.Bóketov atyndaǵy QarMÝ-niń túlegi, áleýmettik ǵylymdar magıstri. Halyqaralyq «Shabyt» shyǵarmashyl jastar festıvaliniń laýreaty. Memleket jáne qoǵam qaıratkeri J.Táshenov atyndaǵy «Jyldyń úzdik aqyny» músháırasynyń júldegeri. «Qaǵaz júrek» jyr kitabynyń avtory.
***
Sheginip kórsem az kúnge keri,
Ómirdiń mánsiz mazmun, deregi.
Taǵdyrdyń maǵan jazbaı ketkenin,
Óleńmen ózim jazǵym keledi...
Jazǵym keledi, jaryqtyq, kemi,
Keregin janym alyp bitpedi!
Úziler sonda tamshydan móldir,
Janarym jasy tamyp kútkeni...
Astynan jerdiń qazylýǵa úıim,
Jaqyn ǵoı...
Sodan qazir ý – kúıim...
Jazǵym keledi!
Jazǵan soń, odan
Jazylý qıyn, jazylý qıyn...
«ROMEO MEN DJÝLETTA» QOIYLYMY
Teatrǵa barǵanbyz.
Eń baqytty shyǵarmyz dep barlyq osy jannan biz.
Kóz aldyńda kirip keldi,
Bir kezdegi arman qyz.
Jıyp qoıyp mańaıdy,
Kóz astymen sen de oǵan qaraısyń, ol da saǵan qaraıdy.
Qasyndaǵy er jigitin aıadym,
Meni qoıshy, jaraıdy.
Meniki – jaı baqylap...
Qaıran, júrek!
Qaıdaǵysy eske túsip jatyr-aq.
Taǵy ótirik qushaqtaısyń,
Bərin sezem, aqymaq!
Eń qıyny – jylamaý,
Birin biri umytpaǵan ekeýge – shydaý əri shydamaý!
«Shyn súıgender qosylmaıdy» –
Qoıylymnyń túri anaý!
Kóz aldymda sýret pa?
Əlde məńgi jazylmaıtyn sezim degen qý dert pa?
Eki ǵashyq sender bolsań, men kimmin,
Eı, Romeo-Djýletta?!
***
Meni óltirmeı keledi, joq qylmaı Muń!
Sol muń úshin ár kózden otty urlaımyn...
Bir dúnıe aıtqysy keldi júrek,
Átteń, syrtqy daýysty kóp tyńdaımyn.
Óz beınemnen ózgeshe ishki qalaý,
Uǵar degen úmitim úsh qulady-aý!
Keıde maǵan unaıdy qanat qaǵý,
Keıde maǵan unaıdy qus qýalaý...
Júginetin tek ishki daýystarǵa,
Aýyshtarǵa qyzyǵam, aýyshtarǵa!
...Ishimde bir on segiz ólip ketken,
Mazalaıdy sol, mezgil aýysqanda!
***
Qoshtasý úshin bir kezdeseıik,
Bir tildeseıik sońǵy ret.
Qap-qara Túnge Kúndi izdeseıik,
Oılap júr Ol da sóndi dep.
Kúnmenen birge kórip qalaıyn,
Kóńiliń sodan kúıse artyq...
Átirdi unaıtyn seýip baraıyn,
Saǵynyshymnyń ıisi ańqyp!
Uzyn kóılektiń syz ap etegin,
Saǵan aıtatyn sát uttym –
Ómirdiń sonsha uzaq ekenin,
Tym qysqa ekenin baqyttyń...
Oınady jalǵan solaı – kóneıik,
Jasymdy jyr qyp jattaıdy el.
Ýaqytqa úzdigip qaraı bereıik,
Sen biraq saǵat taqpaı kel...
BÓTEN ADAM
Saǵan aıtar sózim joq endi, baqsam...
Keshirgim kep turatyn, sen jylatsań!
Alqa qylyp, appaq muń taǵar ma ediń,
Moınymdaǵy qap-qara meńdi unatsań?
Kózdi unatsań, unatsań qylyqty úndi,
Ashylar ma eń...
Keýdeńde qulyp turdy!
Terezeńnen syǵalap, jaryq kútip,
Synyq kóńil aqyry sýyp tyndy.
Jalǵyz ǵana shyndyq eń bes kúndegi,
Óziń jaqtan ózgeshe án estilmedi.
Keshsin meni tambaıtyn jas ta kózden,
Jazylmaıtyn Óleń de keshsin meni!
Sezim ǵana ókinip ótedi oǵan,
Maǵan salsa, saý júrseń jetedi, aman.
Saǵan aıtar jalǵyz-aq sóz qalypty –
Qosh bolyńyz, qurmetti bóten adam!
***
Tańǵy shaı.
Tanys dám alǵyzdyq.
Tek únsiz ishemiz.
Sendegi muń menen mendegi jalǵyzdyq
Túsi – egiz...
Biz kúnde keletin shaıxana.
Daıashy – óńdi qyz.
Ol taǵy tańyrqap qaraıdy, baıqama,
Sol durys.
Taǵy ishte qalady aıtylmaı sonshama oı,
Ketemiz aptyǵyp.
...Ómirge qant qosyp alýǵa bolsa ǵoı,
Tátti ǵyp.
ALǴYS
Alǵys aıtqym keledi eken saǵan, ras!
Osymenen támam kúlki, támam jas.
Bas keıipker muratyna jetken-di,
Ertegige sengenimde eń alǵash...
Meni óltirmeý bolǵan shyǵar muratyń,
Jalǵyz ediń janymdy únsiz uǵatyn.
Kóziń móldir dese bireý, ol kózde
Saǵan degen sezim ǵana turatyn!
Kóńilińe kep tıgenshe salqyny,
Áp-ádemi sátter keshtim ár kúni!
Sen arqyly saǵynýdy úırenip,
Ómirdi de súıdim Óziń arqyly!
Sóıte tura, túk qalmastan tonaldy ish,
Ushar bolsań, baqyt tilep, qol al da ush!
Kúıregenim úshin talaı kóp raxmet,
Súımegeniń úshin meni zor alǵys!
Alǵys aıtqym keledi eken saǵan, ras!
Osymenen támam kúlki, támam jas.
Bul ertegi basqasha aıaqtalý kerek qoı!
- dep oılasań, xabarlas...
***
Mendegi jalǵyzdyq – bitpeıtin jalǵyzdyq,
Bitkenshe qan-soram...
Eshkimnen eshteńe kútpeıtin jalǵyzdyq –
Kútýden sharshaǵan.
Mendegi jalǵyzdyq – dert te ózi, em de – ózi,
Álegi, áli kóp.
Muńlyqtyń muńlyǵy, kerbezdiń kerbezi –
Dos túgil, jaýy joq.
Áldekim áldene aıtýǵa oqtalsa,
Keledi keńeskim.
Ol biraq:
«Jalǵyzdyq Qudaıǵa ǵana jarasqan» - deıdi kóp bolsa,
Men – Qudaı emespin...
***
Ótti kóktem, ótedi erteń jaz da anaý,
Ótkendi ári kerek pe osy qazbalaý?
Óziń qaıtyp oralar dep júrgende,
Ómir ótip barady ǵoı, jazǵan-aý!
Ómir ótip barady ǵoı, jas attap,
Qoldan jasaı almaǵan soń qashap baq,
Sezim jaıly aıtady erteń óleńder,
Ózim jaıly aıtar bárin shash appaq.
Jastyq qaıda? Jalyndaǵan ot qaıda?
Dep júrgende, júrek bir kún toqtaıdy, á?
Qaıta aınalyp soqpaı ketken Sen ǵana,
Mezgil de ózi qaıta aınalyp soqpaı ma?
Ótti kóktem, ótedi erteń jaz da anaý,
Ótkendi endi keregi joq qazbalaý.
Óziń qaıtyp oralar dep júrgende,
Ómir ótip ketipti ǵoı, jazǵan-aý...
"Adyrna" ulttyq portaly
