Jambyl oblysynda ūzaq uaqyt boiy Qytai azamattarynyŋ zaŋsyz köşı-qonyn ūiymdastyryp kelgen polisiia qyzmetkerlerı men Qytai qazaǧy sottaldy. Būl turaly ŪQK habarlady.
ŪQK deregınşe, Qytaidan migranttarynyŋ zaŋsyz arnasyn Taraz qalalyq köşı-qon polisiiasy bölımınıŋ qyzmetkerlerı ūiymdastyrǧan.
5 nauryzda Taraz qalalyq №2 sotynyŋ ükımımen osy ıs boiynşa köşı-qon polisiiasy bölımınıŋ būrynǧy basşysy A. Zeidaliev tört jarym jylǧa, onyŋ orynbasary B. Nauryzbaev üş jarym jylǧa sottaldy. Olar "lauazymyn asyra paidalandy" jäne "adamdardyŋ zaŋsyz köşı-qonyn ūiymdastyrdy" dep aiyptalǧan.
Al Qytaida tuǧan U. Silambek esımdı azamat "deldal" bolǧany üşın 4 jylǧa bas bostandyǧynan aiyryldy. Oǧan "adamdardyŋ zaŋsyz köşı-qonyn ūiymdastyrdy" degen aiyp taǧylǧan.
ŪQK Qazaqstan aumaǧynda tūruǧa zaŋsyz rūqsat alǧan Qytai azamattarynyŋ qūjattarynyŋ küşın joiu jaǧyn qarastyryp jatqanyn habarlady.
