Elimizdiń maqtanyshy, arbaǵa otyryp bıleýden álem chempıony Malıka Muhtarova qaıtys boldy, dep jazady "Adyrna". Bul týraly Ashat Maemırov Facebook paraqshasynda estirtti.
"Elimizge tanymal sportshy, para sport boıynsha otandyq, halyqaralyq, álemdik týrnırler men chempıonattardyń birneshe dúrkin jeńimpazy, halyqaralyq sport sheberi, álem chemıpony, Qazaqstannyń ınklıýzııa teatr keńistigindegi shoqtyǵy bıik aktrısa Malıka Muhtarova 23 jastan asqan shaǵynda dúnıe saldy. Malıka týraly ótken shaqta sóıleý óte qıyn... Kishkentaıynan ómiri qıyndyqqa toly bolyp, arbaǵa tańyldy. Biraq eshqashan moıymady. Tabıǵaty erekshe, talanty bólek, adamı qasıetteri erek Malıka - naǵyz kúreskerge aınaldy. Jan saraıy meıirimge toly, júregi "Óner" dep soqqan Malıka - qaısarlyq pen batyldyqtyń, maqsatshyldyq pen eńbekqorlyqtyń jarqyn úlgisi bola bildi" dep qaıǵyra esine aldy Ashat Maemırov.
Malıka Muhtarova 2000 jyly 21 naýryzda Qostanaı oblysyndaǵy Meńdiqara aýdanynda dúnıege keldi. Qostanaı qalasyndaǵy Gafý Qaıyrbekov atyndaǵy №9 orta mektepti támámdady. Qostanaı memlekettik pedagogıkalyq ýnıversıtetin aıaqtady. Para sporttan halyqaralyq dárejedegi sport sheberi. Arbaǵa otyryp sporttyq bı bıleýden Respýblıkalyq, halyqaralyq, álemdik týrnırler men chempıonattardyń jeńimpazy.
Marqumnyń týystary men jaqyndaryna "Adyrna" ujymy atynan qaıǵyra kóńil aıtamyz!
