Qańtardaǵy qyrǵyn kezinde "qarýdy zańsyz ıemdendi", "qarýdy zańsyz ustady", "bılik ókiline kúsh kórsetti" dep aıyptalyp, 16 jylǵa sottalǵan Taraz turǵyny Erbol Jumanov tergeý ızolıatorynda óz denesine jaraqat saldy. Bul aqparatty birinshi bolyp áleýmettik jelide quqyq qorǵaýshy Rınat Rafkat jarııalaǵan dep habarlaıdy "Adyrna" ulttyq portaly "Azattyq radıosyna" silteme kórsete otyryp.
Erbol Jumanovtyń óz denesin jaraqattaǵanyn advokaty Jalǵas Saparhanova rastady. Aqparatqa qaraǵanda, Jumanov sot úkimine qarsy bolǵan.
Advokattyń aıtýynsha, oqıǵa 6 kún buryn bolǵan. Sol úshin ol jeke kameraǵa qamalǵan. Ázirge onyń densaýlyǵy týraly málimet joq.
Tarazdaǵy tergeý ızolıatory bastyǵynyń orynbasary Tımýr Sandybaev Jumanovtyń mundaı áreketke barǵanyn rastady. Onyń aıtýynsha, "jaraqat salǵany úshin" taǵaıyndalǵan qamaý merzimi aıaqtalǵan. "Densaýlyǵyna esh qaýip joq" dedi ol.
Jumanovtyń isi boıynsha apellıaııalyq otyrys 29 maýsymǵa belgilengen. 28 sáýirde Taraz soty Qańtar oqıǵasyna baılanysty aıyptalǵan tórt adamǵa túrme jazasyn bergen. Tórt adamnyń ishinde eń uzaq jaza osy Erbol Jumanovqa berilgen edi.
Jumanov Qańtar kezinde qarý alǵanyn moıyndaǵanmen "adam óltirmedim" degen.
"Qarýdy men saǵat 16.00-de alǵanmyn, al qaza tapqan adamǵa oq 15.18-de tıgen. Meni jazyqsyz túrmege jaýyp jatyr" degen edi ol sotta.
Resmı málimet boıynsha, Qańtar oqıǵasy kezinde Tarazda 15 adam mert bolǵan. Al búkil Qazaqstan boıynsha kemi 238 adam qaza tapqan.
"Adyrna" ulttyq portaly
