BAQ-qa töngen qauıp. Almatyda jurnalist pen operator soqqyǧa jyǧyldy

Almaty telearnasynyŋ jurnalisı men teleoperatoryna azamattyq belsendı dene jaraqatyn salyp, ştativtı syndyrǧan, dep habarlaidy “Adyrna”tılşısı Qaz365.kz- ke sıltep. "Almaty" arnasynyŋ mälımdeuınşe qyzmetkerlerıne bır azamat şabuyl jasaǧan. Kınälı azamatqa zaŋ şeŋberınde şara qoldanyluyn talap etıp otyr. “Almaty” arnasynyŋ tüsırılım toby 14 tamyz künı ädettegıdei käsıbi mındetterın atqarǧan. Alaida BAQ ökılderıne şabuyl jasalǧan.  “Almaty” telearnasynyŋ ūjymy: “Qūrmettı dostar! Bügın alaŋdatarlyq bır jaǧdai boldy. Qaŋtar oqiǧasy kezınde qaza tapqan 4 jastaǧy Aikörkem Meldehannyŋ ölımıne qatysty Almaty garnizonynyŋ äskeri soty maŋynda bızdıŋ ärıptesterımızge azamattyq belsendı Belialov Baibah küş körsettı. Eş sebepsız tüsırılım tobyna tap bergen azamat jurnalist pen teleoperatorǧa dene jaraqatyn salyp, beinekamera ştativın syndyrǧan. Onymen qoimai ärıptesterımızge būdan keiın de qandai da bır äreket jasaitynyn aityp, qorqytqan, boqauyz söz aitqan. Bız Aikörkem Meldehannyŋ qazasyna qaiǧyramyz, bıraq būl oqiǧaǧa da beijai qarai almaimyz. Sonymen qatar BAQ ökılderıne küş körsetudı tärtıpsızdık häm zaŋǧa qaişy äreket dep sanaitynymyzdy jetkızgımız keledı. Osy tūsta kınälı azamatqa zaŋ şeŋberınde şara qoldanyluyn talap etemız”, - delıngen mälımdemede. Telearna ūjymy  Bas prokuratura men Işkı ıster ministrlıgınen, QR Aqparat jäne qoǧamdyq damu ministrlıgınen qyzmetkerlerdıŋ jeke qauıpsızdıgın qamtamasyz etudı sūraidy. Soŋǧy jyldary BAQ ökılderıne jasalatyn şabuyl köbeigen. 2022 jylǧy statistikaǧa süiensek, älem boiynşa 67 jurnalist kısı qolynan qaza tapqan.