Búgin Taldyqorǵan halqy ortalyq alańda «Shahmat kerýenin» qarsy aldy.
Freedom Broker bas seriktesiniń qoldaýymen júzege asyp jatqan joba shahmat sportyn óńirlerde keńinen dáripteýdi kózdeıdi.
Kerýen ıdeıasy saýdamen qatar, halyqtardyń mádenı jáne sporttyq murasyn álemge taratqan Uly Jibek jolyna negizdelgen.
«Týrnırdiń maqsaty – shahmatty áýesqoı oıynshylar arasynda kóbirek nasıhattaý. Oǵan mektep oqýshylary da, zeınetkerler de qatysa alady. Mundaǵy eń basty erekshelik, qatysýshylar jynysyna, jasyna, áleýmettik mártebesine qaramastan, barlyǵy bir shahmat taqtasynda baq synasa alady», – deıdi Qazaqstan shahmat federaııasy prezıdentiniń keńesshisi Oleg Rıabchenko.
Kerýenniń kelýi aıasynda Qazaqstan shahmat federaııasynyń Jetisý oblystyq fılıaly ashyldy. Onyń tóraǵasy bolyp oblys ákiminiń orynbasary Rýstam Álı taǵaıyndaldy.
«Búgin Taldyqorǵannyń aýa raıy da tamasha, halyq ta kóp jınaldy. Qalamyzda shahmat federaııasynyń jańa fılıaly ashylyp, bizge úlken jaýapkershilik artylyp otyr. Jastarymyzdyń ıntellektýaldy, bilimdi ult bolyp qalyptasýynda bul sport túriniń alatyn orny erekshe», – dedi tóraǵa. Sondaı-aq ol 2025-27 jyldarǵa arnalǵan damý josparynda balalar men jasóspirimderdi shahmatqa belsendi tartý máselesi bar ekenin atap ótti.
Ortalyq alańda ornatylǵan jyljymaly kıiz úı ishinde shahmattan týrnır ótti. Sondaı-aq munda Qazaqstan quramasynyń namysyn qorǵap, álem chempıonatynyń kúmis júldegeri atanǵan Ksenııa Balabaevamen bir mezettik oıyn seansy ótti.
«Shahmat kerýeni» – basqa qaladaǵy jarystarǵa bara almaıtyn adamdar úshin óte jaqsy múmkindik. Olar osy týrnırde tájirıbe jınaqtap, jattyǵady jáne bir mezgilde myqty shahmatshylarǵa qarsy oınaıdy», – dedi Ksenııa Balabaeva.
Oblystyq kezeńniń irikteý týrnırine 75 adam qatysyp, onyń ishinen 20-sy ǵana búgingi jartylaı fınalǵa ótken. Týrnırdiń I oryn ıegeri atanǵan Ǵanı Túgelbaev shahmatpen bala kezinen aınalysqan eken. Oǵan 100 myń teńge syıaqy tabys etildi. II oryn júldegeri Ernazar Isýmbaev 50 myń, III oryn alǵan Vıtalıı Ovchınnıkov 30 myń teńge sertıfıkattarymen marapattaldy. Osy úsh jeńimpaz da qarasha aıynda Túrkistanda ótetin grand-fınalǵa joldama aldy.
10 qyrkúıekten bastap, búginde segiz qalany aralap úlgergen kerýen 10 qarashaǵa deıin elimizdiń túkpir-túkpirine sapar shegedi.
