Qalaǧa jaqyn kışkentai auylda tūratyn qyz qarapaiym otbasynda ömırge keldı. Onyŋ ata-anasy jūmys ıstep, ekı balasyn qoldarynan kelgenşe ösırdı. Qyz bala 13 jasqa kelgende äke-şeşesı ajyrasyp kettı. Er adam basqa äielmen köŋıl jarastyryp, bölek tūrsa, jasöspırımnıŋ anasy alkogolge täueldı bolyp, ışımdıkke salynady.
Osyndai jaǧdailarǧa bailanysty 13 jastaǧy qyzdy naǧaşylary uaqytşa qamqorlyqqa aldy. Nätijesınde, qyz oŋtüstık astanadaǧy qaiyrymdylyq mekemelerınıŋ bırıne tüsedı. Otbasylyq jaǧdaidy estıgen äkımşılık ony mekemege tez qabyldap, mektepke oquǧa jıberedı.
Alaida jasöspırımnıŋ tuystary qaiyrymdylyq dep atalatyn mekemenıŋ astyrtyn «medrese» retınde jūmys ısteitının jäne «süleimenşıler» dep atalatyn dıni aǧymnyŋ bırı ekenın bılmegen. Būl jamaǧat atauy olardyŋ köşbasşylary Süleimen Hilmi Tunahan esımımen atalady.
Anyqtama: süleimenşıler— islamnyŋ radikaldy türın, pantürkizmdı, panislamizmdı nasihattaityn türık dıni sektasy. Qozǧalys bükıl islam älemınıŋ Türkiianyŋ ainalasyndaǧy bır memleket «Ūly Tūran» aiasynda bırıguın jaqtaidy. Ūiymnyŋ qyzmetıne älemnıŋ bırqatar elınde tyiym salynǧan.
Alǧaşqy kezde oqytuşylar qyzǧa jaqsy qarap, ony hidjab kiiuge mındettemegen. Jasöspırım basqalarmen bırge arab tılın üirenu sabaqtaryna üzdıksız qatysyp, keşkı uaqytta «ūstazdyŋ» ärtürlı dıni taqyryptardaǧy uaǧyzdaryn tyŋdaǧan. Uaqyt öte kele ūstazdar basqa şäkırtterı arqyly qyzǧa «senı tamaqtandyryp, tegın baspanamen qamtamasyz etıp jatyrmyz, ūstazyŋ üşın orana da almaisyŋ» degen äŋgıme arqyly qysym körsete bastaǧan. Būndai psihologiialyq şabuyldardan keiın qyz «hidjab» kiıp, osy qozǧalystyŋ ılımderıne tolyǧymen enıp ketedı. Namaz oqumen qatar, olar «Rabyta» räsımı arqyly marqūm bolǧan şeih Süleimen Hilmi Tunahannyŋ kielı ruhymen bailanys ornatyp, islam dınıne qaişy keletın dästürlı emes yrym-tyiymdardy bırlesıp oryndaǧan. Mūǧalımder studentterge jaqyndarymen jäne basqa adamdarmen oqu ornynyŋ qabyrǧasynda dındı oqytu turaly söilesudıŋ qajetı joq ekenın aityp, keibır jaǧdaida qorqytyp, olardyŋ arasynda terıs piǧyldy adamdar bar dep tüsındıredı. Quanyşqa orai, qyzdyŋ tuystary qaiyrymdylyq ūiymynyŋ jasyryn äreketterın der kezınde bılıp, qyz balany sol jerden alyp ketken. Osy oqiǧadan keiın mūǧalımder, tıptı mekeme direktory qyzdyŋ tuystaryna qaita-qaita kelıp, oquyn jalǧastyrudy sūraǧan. Boijetken de mekemege qaita oralǧysy keletının jetkızgen, öitkenı mektep bıtırgen soŋ ūstaz Türkiiaǧa tereŋırek bılım aluǧa jıberemın dep uäde etken. Jasöspırımnıŋ aituynşa, basqa studentter men ūstazdar oǧan balaǧat sözder jazyp, qiiamet künı ūstaz Süleimen Tunahan kömektespeitının aitqan. Osy jaǧdaidan keiın boijetken qoǧamnan alşaqtap, būl ūstazdardyŋ nelıkten ekıjüzdı ekenın tüsıne almaidy. Osyndai qyzdyŋ ömırındegı qiyn qystau kezde jergılıktı imamdar dästürlı islam turaly tolyq aqparat berıp, dūrys jol körsettı.
Qazır uaqytta, boijetken megapolistegı memlekettık universitette oqidy. Ol jastar men ata-analardy balalaryn kümändı qaiyrymdylyq mekemelerıne jıbermeudı eskertedı jäne onyŋ äŋgımesı basqalarǧa ülgı bolady dep oilaidy.
Ūqsas jaŋalyqtar
