Memleket basşysy Qasym-Jomart Toqaev elımızge resmi sapary aiaqtalǧan Fransiia Prezidentı Emmaniuel Makrondy äuejaidan qūrmettep şyǧaryp saldy. Būl turaly Aqordanyŋ baspasöz qyzmetı jariialady, dep habarlaidy “Adyrna” ūlttyq portaly.
Äuejaiǧa barmas būryn ekı el prezidentterı «Etnoauyl» körmesın tamaşalady. Fransiia Prezidentınıŋ Qazaqstanǧa resmi saparyna orai qazaq halqynyŋ bai mädeni mūrasymen tanystyratyn «Etnoauyl» arnaiy körmesı ūiymdastyryldy.
Memleketter basşylary bastaǧan delegasiiany körme alaŋynda Jas körermender teatrynyŋ ärtısterı men «Qorqyt» etno-folklorlyq ansamblı än şaşumen qarsy aldy.
Fransiiadan kelgen joǧary märtebelı meimandar jemıs-jidekpen bezendırılgen «Kök bazardy», qolöner būiymdaryn jäne qazaq suretşılerınıŋ kartinalaryn, sondai-aq otandyq dizainerler äzırlegen ūlttyq sän ülgılerınıŋ defilesın tamaşalady.
Sonymen qatar şeteldık qonaqtarǧa Ūlttyq muzei qoryndaǧy eksponattardan («Altyn adam», «Berel jylqysy», «Sarmat kösemı», «Qypşaq jauyngerı» t.b) jasaqtalǧan «Ūly dala altyny» ekspozisiiasy, Yqylas Dükenūly atyndaǧy mūrajaidaǧy ūlttyq muzykalyq aspaptar tanystyryldy.
Etnoauyl aumaǧynda Qasym-Jomart Toqaev pen Emmaniuel Makronǧa baluandarymyz qazaq küresınıŋ ädıs-täsılderın, jas jetkınşekter asyq oiynyn, al saiatşylar men qūsbegıler tazy itterı men qyran qūstaryn körsetıp, halqymyzdyŋ aŋşylyq dästürı turaly äŋgımelep berdı.
«Etnoauyldy» aralau barysynda qonaqtarǧa «Qazaq küresı» ūlttyq küresınen jäne «asyq atu» oiynynan körsetılım qoiylymdary ūiymdastyryldy. Sonymen qatar, tazy itterı men jyrtqyş qūstardyŋ mümkındıkterı körsetıldı.
Körmeden keiın Toqaev Makrondy äuejaidan şyǧaryp saldy.
Qazaqstan saparynan keiın Makron Özbekstanǧa barǧan. Ol Özbekstan Respublikasynyŋ Prezidentı Şavkat Mirzieevpen bırge Samarqand tünımen seruendep qaitqan.
Ekı el basşylary IýNESKO-nyŋ Bükılälemdık mūralar tızımıne engen Registan säulet ansamblın aralady.
Esterıŋızge sala keteiık, Emmaniuel Makron sauda-ekonomikalyq, investisiialyq jäne energetikalyq yntymaqtastyqty nyǧaitu boiynşa kelıssözder jürgızıp, halyqaralyq jäne aimaqtyq kün tärtıbındegı mäselelerdı talqylauǧa Qazaqstanǧa resmi saparmen kelgen bolatyn. Ony elorda äuejaiynda QR Premer-ministrı Älihan Smaiylov qarsy alǧan edı.
