Amerıkanyń Chıkago qalasynda qazaqtyń ulttyq taǵamdaryn usynatyn «Tary» dámhanasy óz jumysyn bastady. «Adyrna» tilshisi ony ashýshylardyń biri Symbat Jarqynqyzymen tildesip, az-kem áńgime qurdy.
«BIZNES AShÝ QIYN EMES»
- AQSh-qa joǵary oqý ornynan keıingi bilimimdi jalǵastyrý úshin kelgen bolatynmyn. Magıstratýrada digital marketing mamandyǵyn oqydym. Qazirgi tańda Chıkagoda turyp jatqanyma 3 jyldyń júzi boldy. Osy qalada ulttyq naqyshtaǵy qazaq dámhanasyn ashý ıdeıasy 1 jyl buryn keldi. Qazaqstanǵa barǵanymda nýtrıologym barý kerek tamaqtaný oryndarynyń tizimin bergen edi. Olardyń arasynda «Tary» etno-kofehanasy da boldy. Sol kezden bastap jańa kásip týraly oılana bastadym. Keıinnen «Tary»-nyń franshızasyn satyp alýǵa bolatynyn estip, birden iske kirestik. Shyny kerek, bul salada buryn jumys istemedim. Alaıda ınvestıııa bolsa, bıznes ashý qıyn emes ekenine kózim jetti, - dep áńgimesin bastady keıipkerimiz.
Symbat Jarqynqyzynyń aıtýynsha, AQSh-ta báseke joǵary.
- Árıne, Qazaqstanmen salystyrǵanda bul jaqta báseke áldeqaıda joǵary. Dese de, bizdiń jobamyz basqalardan erekshe jasalǵan dep aıta alamyn. Jumysty bastamas buryn naqty jospar qurdyq. «Amerıkaǵa qalaı alyp kelemiz?», «Bul jobamen qandaı jetistikterge jetkimiz keledi?» degen syndy suraqtarǵa jaýap izdedik. Al dámhanany ashý barysynda lokaııaǵa mán berdik. Chıkagodaǵy «Tary» daýntaýnnyń ortasynda, ıaǵnı ofıster men turǵyn úı keshenderi kóp aýdanda ornalasqan. Qazir bizge amerıkalyqtar jıi keledi. Bizdiń basty maqsatymyz — sheteldikterge salt-dástúrimizdi, ulttyq ashanamyzdy tanystyrý. Qazir bul oıymyz aqyryndap oryndalyp jatyr, -deıdi ol.
«MÁZIRDIŃ 70 PAIYZY – QAZAQTYŃ ULTTYQ TAǴAMY»
Jas kásipker dámhana bıznesiniń damýyna sheteldegi qazaqtardyń da kóp septigin tıgizgenderin atap ótti.
- Bizdi, eń aldymen, AQSh-taǵy qazaqtar erekshe qoldady. Ashylýymyzǵa basqa shtattardan da kelgender boldy. Olar eldiń tamaǵyn saǵynǵandaryn aıtady. Qazirgi tańda otandastyrymyz ózderiniń áriptesterin, dostaryn bizge jıi alyp keledi. Bul da bir úlken kómek, - dep sózin tolyqtyrdy Symbat.
- Qazirgi tańda mázirimizdiń 70 paıyzyn qazaqtyń ulttyq taǵamdary quraıdy. Olardyń arasynda qýyrdaq, bylamyq, maısók bar. Al qalǵan bóligi amerıkalyqtarǵa belgili astan turady. Aldaǵy ýaqytta mázirdi keńeıtetin bolamyz, - dep túsindirdi Chıkago qalasynda qazaqtyń ulttyq taǵamdaryn usynatyn «Tary» dámhanasyn ashqan Symbat Jarqynqyzy.
Dıana Asan
«Adyrna» ulttyq portaly
