Almaty qalasy Din isteri jónindegi basqarmasynyń tapsyrysymen eldegi ózekti taqyryptarǵa aınalǵan din máselesi jóninde derekti fılm jaryq kórdi. Týyndyda eldegi sońǵy jaıttarǵa qatysty mańyzdy taqyryptarǵa jaýap berilip, arnaıy mamandardyń pikiri qamtylǵan.
Almaty qalasy Din isteri jónindegi basqarmasy áleýmettik platformaǵa kópshilik nazaryna ashyq derekti fılm usyndy. Fılm arnaıy segiz bólimsheden quralyp, mamandardyń pikirimen saraptalyp berilgen.
«Sharıǵı bilim kerek pe?»
Derekti fılm jastardyń arasyndaǵy sharıǵı bilimniń taralýy men onyń mańyzdylyǵy týraly sózden bastalady. Naqtyraq aıtsaq, álemdegi eń kóne ýnıversıtetterdiń biri, sonymen qatar eń bedeldi musylman rýhanı ýnıversıteti Ál-Azhar jaıly aqparat berilip, bizdiń eldegi Nur-Múbarak ýnıversıteti beretin bilimdi mise tutpaı júrgen jastar týraly sóz qozǵalady.
Sonymen qatar Ál-Azhar ýnıversıtetiniń professory Ato As Symbattıdiń sharıǵı bilim týraly oıy men Qazaqstandaǵy dinı bilim deńgeıine qatysty pikiri de qosylǵan. Atalǵan taqyrypqa qatysty Nur-Múbarak ýnıversıtetiniń Islam mádenıeti prorektory Qaırat Qurmanbaev ta oıyn bildiredi. Aıta keteıik, Ál-Azhar dinı oqý ornyn 988 jyly Kaırde Fatımıdter áýleti qurǵan.
«Sultan Beıbarys meshiti nege qańyrap tur?»
Sultan Beıbarys meshitin — Sultan Beıbarys 1266 — 68 jj. saldyrǵan. Ol — qazirgi kezde Mysyrdaǵy eń tanymal meshitterdiń biri. Beıbarys sultan meshiti, Kaır. Ál-Káhıra qalasynyń soltústigindegi eski qorǵanynan tys jerde eń alǵashqy bolyp boı kótergen bul ǵımaratty salýda sol zamannyń ozyq qurylys tásilderi men quraldary qoldanylǵan.
Derekti fılmde atalmysh qulshylyq ornynyń nelikten birneshe jyl boıy qoldanysta bolmaǵany jaıly sóz etiledi.
«Márkazdardyń maqsaty ne?»
Jat aǵymnyń jetegine ketken bizdiń eldiń jastary men olardyń bilim alyp jatqan oqý oryndary jaıly jáne olardy osy joldy tańdaýǵa, osy baǵyt negizinde ketýge ne ıtermeleıtini jaıly baıandalady.
Bul týraly dintanýshy, ımam, ustazdar óz pikirin aıtady. Onyń ishinde el aýzynda júrgen Nurlan Baıjigituly syndy dinı mamandardyń aıtqandary qamtylǵan.
«Ult birinshi me, din be?»
Qoǵam talqysy qashan da el úshin mańyzy zor másele. Jıi talqyǵa túsetin taqyryptar qatarynda dinı ahýal máselesi kósh bastap tur. Din men ult sekildi qos uǵymnyń sharttary kereǵar kelgen sátte, kópshilik abdyrap qalady. Sonymen qaısysy birinshi júrýi tıis? Din be ult pa?
Din men ult – adam bolmysynyń jáne áleýmettik uıymnyń eki túrli aspektileri.
Naqtyraq alsaq din - ádette tabıǵattan tys nemese joǵary kúshke senýmen baılanysty nanymdardyń, kýltterdiń, rásimderdiń jáne moraldyq prınıpterdiń júıesin bildiredi. Ultyna qaramastan, ortaq rýhanı nanym-senim negizinde adamdardy biriktire alady. Mysal retinde hrıstıandyq, ıslam, býddızm jáne basqa da dinı senimderdi keltirýge bolady.
Al ult - shyǵý tegi, tarıhy, mádenıeti, terrıtorııasy nemese tili ortaq adamdar tobyn bildiredi. Ulttyq biregeılikti belgili bir memleketke nemese etnıkalyq topqa jatqyzý arqyly anyqtaýǵa bolady. Bir ultqa ártúrli dinı senimdegi adamdardy jatqyzýǵa bolady.
Derekti fılmdi qos uǵymnyń máni men mańyzdylyǵy qatar túsindiriledi.
«Ahılarǵa aldanǵan arýlar nege kóp?»
Almatydaǵy ońaltý ortalyǵyna júgingen áıeldiń tikeleı suhbaty atalmysh fılmde ashyq kórsetiledi.
Ahılarǵa, din jolyndamyz dep sendirgen alaıaqtarǵa aldanǵan qaryndastarymyzdyń máselesi ashyq baıandalady.
Din men daqpyrt taqyrybyndaǵy dinı ózekti suraqtardyń jaýabyn tómendegi derekti fılmnen kóre alasyzdar:
«Adyrna» ulttyq portaly
