Táýelsizdik kúni qarsańynda elordada «AMANAT» partııasynyń dástúrli «Uly dala» respýblıkalyq shyǵarmashylyq baıqaýy qorytyndylandy. Bıyl ádebı doda Alash qozǵalysynyń qaıratkeri, aqyn, pedagog Maǵjan Jumabaevtyń 130 jyldyǵyna arnaldy.
Sóz basynda Májilis Spıkeri, «AMANAT» partııasynyń Tóraǵasy Erlan Qoshanov ulttyq múddege saı keletin kitaptardy kóptep basyp shyǵarý máselesi árdaıym Memleket basshysy Qasym-Jomart Toqaevtyń nazarynda ekenin jáne memleket, partııa tarapynan mádenıetke, ádebıetke qoldan kelgenshe kómek kórsetile beretinin atap ótti.
«Ádebıettegi jas býyn úshin «Uly dala» baıqaýy aıtýly oqıǵaǵa aınaldy dep oılaımyn. Osy mańyzdy is-sharany jyl saıyn Táýelsizdik kúnine oraılastyryp ótkizemiz. Óıtkeni, ult táýelsizdiginiń rýhanı tiregi – onyń tili men ádebıeti, mádenıeti. Biz óz tarapymyzdan sizderdi qoldaýǵa árdaıym ázirmiz», – dedi ol.
Erlan Qoshanovtyń pikirinshe, qazir qoǵamdyq keselge aınalǵan esirtki, lýdomanııanyń beleń alýy «rýhanı qalqannyń» bolmaýynan. Sondyqtan oqyrmanǵa osy zamannyń bolmysyn beıneleıtin tyń týyndylar, obrazdar men jańa keıipkerler kerek. Tóraǵa kitapsúıer qaýym jańa tolqyn qalamgerlerden salmaqty, maǵynaly dúnıeler kútip otyrǵanyn aıtty.
«Biz kitappen ómir súrdik. Ádebıet bizge moraldyq, rýhanı qalqan boldy. Al rýhanı qalqan degenimiz ne? Ol – jastardy, óskeleń urpaqty durys jolǵa baǵyttap, burys joldan saqtaıtyn qundylyqtarymyz. Buryn qoǵamdy kitap tárbıelese, qazir ınternet pen kóshe tárbıelep jatyr. Munyń joly – jas urpaqty otanshyldyqqa, izgilikke, adamgershilikke tárbıeleý. Al, ol qundylyqtardyń bári – kitapta, ádebıette. Bul týraly Memleket basshysy da árdaıym aıtyp keledi», – dedi «AMANAT» partııasynyń Tóraǵasy.
Atalǵan konkýrs osymen tórtinshi ret ótkizilip otyr. Bıyl ádebı dodanyń oblystyq irikteýi uıymdastyrylyp, baıqaýǵa bas-aıaǵy 300-den astam shyǵarma kelip tústi. Onyń 170-i aqtyq kezeńge joldama aldy.
«Uly dala» baıqaýyna «Ádebı syn» nomınaııasyn engizý – úlken jańalyq boldy. Jalpy, ádebı syn bolmaıynsha, ádebıet damymaıdy. Baıqaýǵa bir emes, birneshe materıal kelip tústi. Onyń bárin oı eleginen ótkizip, laıyqty baǵasyn berdik. Sondyqtan bul janrǵa keleshekte barynsha kóńil bólý kerek», – dedi qazylar alqasynyń múshesi, ádebı synshy Amangeldi Keńshilikuly.
Sonymen, «Poezııa» nomınaııasy boıynsha birinshi oryndy Umtyl Zaryqqan, ekinshi oryndy Aızada Rahymjanova, úshinshi oryndy Erbol Alshynbaı ıelendi.
«Proza» nomınaııasynda birinshi orynǵa Baqytbek Qadyr, ekinshi orynǵa Saıan Seksenbaev, úshinshi orynǵa Mereı Qaınaruly laıyq dep tanyldy.
«Balalarǵa arnalǵan shyǵarma» nomınaııasy boıynsha birinshi oryndy Nurbek Keńesbaı, ekinshi oryndy Abaı Orynbaı, úshinshi oryndy Aqmaral Omarova qanjyǵalady.
«Dramatýrgııa» nomınaııasynda birinshi oryndy Qanat Tileýhan, ekinshi oryndy Taıbek Abdýllın, úshinshi oryndy Qýat Qıyqbaı jeńip aldy.
«Ádebı syn» nomınaııasy boıynsha birinshi oryn Birjan Ahmerge, ekinshi oryn Anar Abdýllınaǵa, úshinshi oryn Meıir Orazǵalıevke buıyrdy.
Sonymen qatar, «Alash amanaty» arnaıy syılyǵyn zertteýshi-ǵalym Baqtııar Báteý, «Maǵjan Jumabaevtyń 130 jyldyǵy» arnaıy syılyǵyn arnaıy syılyǵyn aqyn, satırık Abylaı Maýdanov ıelendi.
«Qazir ádebıetpen kásibı aınalysýǵa múmkindik az. Birinshiden, qalamaqy máselesi sheshilgen joq, ekinshiden bizde kitap naryǵy áli qalyptaspaı jatyr. Áıtkenmen, osy olqylyqtyń belgili bir bóligin ádebı baıqaýlar toltyryp otyr. Bul qadam shyǵarmashyl jastardy jazýǵa yntalandyrady. Sondyqtan, osyndaı ádebı baıqaýlardy úzbeı, jyl saıyn ótkizip turý kerek»,– dedi baıqaý jeńimpazy, jazýshy Baqytbek Qadyr.
