Depýtat Nartaı Aralbaıuly bılikke syrttan ákelinetin kólik quraldaryna salynatyn kedendik baj salyqtaryna qatysty depýtattyq saýal joldady, dep habarlaıdy "Adyrna" tilshisi.
Májilis depýtaty Nartaı Sársenǵalıev eski avtokólikter máselesin kóterip, sheteldik kólikti elge kirgizý úshin tólenetin tólemderdiń qalta kótermeıtindigine nazar aýdardy.
Májilis otyrysynda máseleni baıandaǵan depýtat qazaqstandyqtar kólikti Qyrǵyzstan arqyly eki ese arzanǵa kirgizip júrgenin, saldarynan el bıýdjeti qyrýar aqshadan qaǵylyp otyrǵanyn aıtty.
Depýtat sandardy sóıleip, arnaıy statıstıka bıýrosynyń málimetin de jaıyp saldy. Onyń sózinshe, Qazaqstanda 4 mıllıon jeńil avtokólik, 454 myń júk kóligi men 95 myń avtobýs bar. Temir tulpardyń talqany shyqpaı júrip beretin ýaqyty — 10 jyldy quraıdy. Al Qazaqstanda tirkelgen jeńil avtokólikterdiń 49% zaýyttan shyqqanyna 20 jyldan asqan, 21% 10 jyl tolǵan.
"Qazaqta: "Shabatyn kólik kúı tileıdi" deıtin bar. Biraq 4 mıllıon jeńil avtokóliktiń teń jartysynyń tas jolǵa tabany tıgenine 20 jyl tolǵan bolsa odan qandaı kúı suraımyz? Úısiz, kúısiz júrgen azamattarymyzdyń eń bolmaǵanda durys kólik mingisi-aq keledi. Biraq oǵan aqylǵa syımaıtyn kedergiler qoıylǵan. Ári qaraı, kóliktiń shyǵarylǵan jylyna qaraı tólem bar. Pervıchka deıdi. Eger Qazaqstanǵa ákelingen kóliktiń shyǵarylǵanyna 3 jyldan assa taǵy 1,8 mıllıon teńge tóleý kerek. Oǵan SVH men porttyń jáne brokerlerdiń aqshasyn qosyńyz. Osynsha mindetti tólemniń saldarynan sheteldegi sapaly avtokólikti Qazaqstan azamattary ákelip mine almaıdy.
Azamattarymyz mindettemelerdi tólemeımiz dep otyrǵan joq, biraq basty problema kedendik setka", - dep depýtat júrgizýshilerdiń basty máselesin bılikke jetkizdi.
Depýtattyń málimetinshe kólik alǵandar taýsylmaıtyn tólemnen arylý úshin kórshiles Qyrǵyzstanǵa tirkeledi.
"Eń soraqysy, taýsylmaıtyn tólemnen arylý úshin shetelden alǵan avtokólikterin aldymen Qyrǵyzstanǵa ákelip tirkeıdi. Ol jaqtaǵy tólem bizden 2 ese az eken. Sosyn Qazaqstanǵa kirgizedi. Osylaısha biz óz qolymyzben ózge eldiń bıýdjetine qarjy quıyp otyrmyz. 2023 jyldyń qańtary men sáýiri aralyǵynda Qyrǵyz eline 41 myń avtokólik kirgen. Keıin sonyń biraz bóligi bizdiń elge ótken delinedi ashyq derekózde. Osylaısha Qazaqstan azamattaryn jaqsy kólik miný quqyǵynan qaǵyp jáne qazynaǵa túsýi tıis qyrýar qarajattan da qaǵylyp otyr", - dep túsindirdi Nartaı Aralbaı.
