Toqaev eldegı jylu jüiesınıŋ eskırgenın atap, ükımet pen äkımdıkterdıŋ mūqiiat boluyn eske saldy, dep jazady “Adyrna” portaly. Būl turaly ol “Egemen Qazaqstan” gazetınn bergen sūhbatynda aitty.
“Jylu elektr ortalyqtaryndaǧy jäne tūrǧyn üi-kommunaldyq şaruaşylyǧyndaǧy müşkıl ahual – köp jylǧy salǧyrttyqtyŋ saldary. Osy saladaǧy tüitkılder bır künde aiaq astynan paida bola qalǧan joq. Onyŋ bärı jyldar boiy qordalanǧan mäseleler ekenı barşaǧa mälım. Öŋırlerdegı jylu ortalyqtary men basqa da qūral-jabdyqtardyŋ 80 paiyzy äbden tozǧan. Ötken jyldarda kommunaldyq şaruaşylyqqa salynǧan investisiia būl salanyŋ qajetın öteuge jetkılıksız boldy” dedı Toqaev jylu jüielerı jaily.
Ol öz sözınde arandatuşylardyŋ da ısın atai kettı:
“Elektr energetikasy nysandarynda bolyp jatatyn kışıgırım oqiǧalardy dardai qylyp körsetıp, jylumen qamtamasyz etu ısındegı bolmaşy olqylyqty «qasıretke ainaldyruǧa» ūmtylatyn äleumettık jelıdegı belsendıler otqa mai qūiyp, eldı dürbeleŋge salyp jür”.
“Bükıl Qazaqstandaǧy injenerlık infraqūrylymdy tolyq jaŋǧyrtu – öte auqymdy ärı kürdelı mındet. Būl mäsele bırtındep şeşılıp jatyr. Köktem-jaz ailarynda Ükımet pen äkımdıkter jylu mausymyna daiyn bolu üşın bıraz jūmys jasady. Jaǧdaiy syn kötermeitın bırqatar nysandy jöndedı. Eŋ aldymen, kürdelı apattardyŋ aldyn alyp, üilerge jyludyŋ üzdıksız berıluın qamtamasyz etu kerek. Bıraq jaŋa quat közderın aşu, jelılerdı bırtındep jaŋartu jäne kommunaldyq salany tügel jaŋǧyrtu basty mındet ekenın ūmytpaǧan jön” dedı prezident.
Sonymen qatar, memleket basşysy qazırgı taŋda eldegı jylu jüiesınıŋ äreŋ jūmys ıstep tūrǧanyn jasyrmady. Jaǧdaidy baqylauǧa alyp, qajettı şaralardy jüzege asyru qajettıgın eske saldy.
“Qazır jylu jelılerı äreŋ jūmys ıstep tūr. Ükımet pen äkımdıkter batyl qimyldap, qajettı şaralardy dereu qolǧa aluy kerek. Onsyz bolmaidy” dedı ol.
Ūqsas jaŋalyqtar
