Memleket Basshysy Qasym-Jomart Toqaev Ulttyq qaýipsizdik komıtetiniń tóraǵasy Ermek Saǵynbaevty qabyldady, dep habarlaıdy "Adyrna" ulttyq portaly Aqordanyń baspasóz qyzmetine silteme jasap.
Prezıdentke vedomstvonyń 2023 jyly atqarǵan jumysynyń negizgi nátıjeleri men aldaǵy kezeńge arnalǵan jospary týraly málimet berildi.
Qasym-Jomart Toqaevqa byltyr UQK bólimsheleri elimizde eki terrorlyq árekettiń jáne sheteldiń arnaýly qyzmetterimen birge ózge memleketterdiń aýmaǵynda úsh lańkestik akııanyń aldyn alǵany jóninde baıandaldy. Lańkestik jáne ekstremıstik qylmystar jasaǵany úshin 43 adam sottaldy. Jyl boıy Ulttyq qaýipsizdik komıtetiniń úılestirýimen terrorızmge qarsy 208 komandalyq-shtabtyq jáne 196 jedel-taktıkalyq oqý-jattyǵý jıyny ótken.
Ermek Saǵymbaev ekonomıkalyq qaýipsizdikti qamtamasyz etý jáne jıi kezdesetin sybaılas jemqorlyqqa qarsy kúres jumystarynyń nátıjesi jóninde aıtty. Qabyldanǵan sharalar nátıjesinde jalpy 1,5 trıllıon teńgeden astam qarjy túsken, sonyń ishinde memlekettik bıýdjetke qaıtarý bastamasy aıasynda 680 mıllıard teńgeden asa qarjy qaıtaryldy.
Sonymen qatar kezdesýde Ishki ister mınıstrligimen birlesip, uıymdasqan 15 qylmystyq top qyzmetiniń joly kesilgeni, sondaı-aq 681 qarý men 85 myńnan astam oq-dári tárkilengeni týraly aıtyldy.
Esirtki bıznesine qarsy is-qımyl boıynsha 36 zerthana joıyldy. 34 halyqaralyq jáne 32 óńirlik esirtki arnasyna tosqaýyl qoıylyp, 3,6 tonna esirtki tárkilendi.
UQK halyqaralyq yntymaqtastyq aıasynda sheteldik áriptesterimen birqatar operaııany júzege asyrdy.
Memlekettik shekarany kúzetý salasynda quqyq buzǵan 31 myńnan astam adam ustalǵan. Qarý-jaraq, oq-dári jáne esirtki alyp ótýge qatysty 739 áreketke, sondaı-aq jalpy somasy 11,7 mıllıard teńge bolatyn valıýta men altyndy, somasy 12,6 mıllıard teńgeni quraıtyn taýardy tasymaldaýǵa jol berilmedi.
Ulttyq qaýipsizdik komıtetiniń tehnıkalyq bólimsheleri memlekettik organdardyń resýrstaryna jáne eldiń mańyzdy strategııalyq ınfraqurylym nysandaryna jasalǵan 86,3 mıllıon kıbershabýyl men 2156 DDoS-shabýyldy toıtarǵan.
