Qasym-Jomart Toqaev Qazaqstanda mındettı äleumettık medisinalyq saqtandyru jüiesınıŋ ıske qosylǧanyna bes jyl bolsa da, sol uaqyttan berı būl salanyŋ biudjetı ekı ese artsa da, medisinalyq kömektıŋ sapasy jaqsarmaǧanyn aitty, dep habarlaidy "Adyrna" ūlttyq portaly.
"Taǧy bır maŋyzdy mındet. Elımızdıŋ barlyq azamatyna bırdei jaǧdai jasap, şyn mänınde kömekke mūqtaj adamdarǧa järdem beru – äleumettık memlekettıŋ basty mındetı. Qazır memleket biudjetınıŋ jartysynan köbı äleumettık salaǧa bölınıp jatyr. Soŋǧy jyldary äleumettık saladaǧy infraqūrylymdy damytu üşın bıraz jūmys atqaryldy. Äleumettık sala mamandarynyŋ, äsırese pedagogter men medisina qyzmetkerlerınıŋ bedelın arttyruǧa basa män berıldı. Endı azamattarǧa körsetıletın qyzmettıŋ sapasyn jaqsartu qajet. Būl – eŋ aldymen, densaulyq saqtau salasyna qatysty mäsele", - dedı prezident.
Memleket basşysy öz sözınde mındettı äleumettık medisinalyq saqtandyru jüiesınıŋ ıske qosylǧanyna bes jyl bolǧanyn atap ötıp, sol uaqyttan berı sala biudjetı ekı ese artqanyn tılge tiek ettı.
"Biyl 2,6 trillion teŋge bölınedı. Alaida medisinalyq kömektıŋ sapasy aitarlyqtai jaqsardy dep aituǧa bolmaidy. Köptegen qyzmet älı de qoljetımdı emes. Būdan bölek köp jaǧdaida resurstar tiımsız jūmsalady. Sonyŋ saldarynan būl salaǧa qosymşa qarjy bölıp, biudjetke salmaq saluǧa tura keledı. Ükımet medisinalyq saqtandyru jüiesınıŋ qyzmetın qataŋ baqylauǧa aluy kerek. Būl jüie qarapaiym ärı tüsınıktı boluǧa tiıs", - dedı prezident.
Ūqsas jaŋalyqtar
