“Otanǵa opasyzdyq jasady” degen aıyppen 10 jylǵa sottalǵan qazaqstandyq belgili sınolog Konstantın Syroejkınniń shartty túrde merziminen buryn bosatý ótiniminen bas tartylǵannan keıin ol prezıdent Qasym-Jomart Toqaevtyń barlyq ıgi bastamalaryna sabotaj jasalyp jatqanyn aıtty. Bul týraly Zona KZ jazdy, dep habarlaıdy “Adyrna” ulttyq portaly.
«Prezıdent Q.Q.Toqaevtyń barlyq ıgi bastamalaryna tosqaýyl qoıyldy (sabotaj jasaldy) nemese múldem kerisinshe júzege asyrylýda», - dep jazdy Syroejkın ınternet-gazet redaktoryna jazǵan hatynda.
Shartty túrde merziminen buryn bosatý ótinimi qoldaý tappaǵannan keıin ol Bas prokýror Berik Asylovqa Qonaev soty men Almaty oblystyq sotynyń sottalǵandardyń shartty túrde merziminen buryn bosatý týraly ótinishterin qanaǵattandyrýdan bas tartý qaýlylarynyń zańdylyǵyn baǵalaýdy, sondaı-aq isterdi qaraýǵa qatysatyn prokýrorlardyń qyzmetin baǵalaý jáne olardyń sheshimderiniń Konstıtýııaǵa jáne «Prokýratýra týraly» zańǵa sáıkestigin anyqtaýdy surap júgingen.
Aıta keteıik, buǵan deıin Konstantın Syroejkın Qasym-Jomart Toqaevtan raqymshylyq jasaýdy suraǵanyn jazǵan edik.
Eske salaıyq, 2019 jyly Konstantın Syroejkın Qylmystyq kodekstiń 175-babynyń 1-bólimi «Memleketke opasyzdyq jasaý» boıynsha kináli dep tanylǵan edi. Ol — qytaıtanýshy ǵalym, kóptegen kitaptyń, sondaı-aq orys, aǵylshyn jáne qytaı tilderindegi myńnan asa maqalanyń avtory. Zertteýshi uzaq jyldar boıy Qazaqstan Respýblıkasy Prezıdenti janyndaǵy Qazaqstan strategııalyq zertteý ınstıtýtynyń bas ǵylymı qyzmetkeri jumysyn atqardy.
Onyń kitaptary: «Qytaıdaǵy qazaqtar: áleýmettik-ekonomıkalyq jáne mádenı damý ocherkteri», «Qazirgi Shyńjań jáne onyń qazaq-qytaı qatynastaryndaǵy orny», «Qazaqstan-Qytaı: shekaralyq yntymaqtastyqtan strategııalyq seriktestikke», «Qazaqstan Qytaıdan qorqý kerek pe: mıfter men fobııalar».
