Májilis tóraǵasy Erlan Qoshanov jalpy otyrysta Ulttyq Quryltaıda aıtylǵan máseleler boıynsha Parlamenttik tyńdaý ótkiziletinin málimdedi.
– Memleket basshysy elimizdiń rýhanı-ıdeologııalyq, halyqtyń turmysyn jaqsartýǵa baǵyttalǵan áleýmettik-ekonomıkalyq baǵdarlaryn aıqyndap berdi. Prezıdenttiń kótergen keleli máseleleri men sóılegen sózin baǵdarlamalyq qujat retinde qabyldaýǵa bolady. Qasym-Jomart Kemeluly ózekti problemalarǵa toqtalyp, olardy sheshýdiń strategııalyq jáne shuǵyl tásilderin atap kórsetti. Sonyń ishinde depýtattarǵa birqatar mindet júktedi. Biz endi solardy oryndaýǵa jedel kirisýimiz kerek, – dedi Erlan Qoshanov.
Májilis spıkeri Gerbtiń beınesine baılanysty jastar, qoǵam belsendileri tarapynan kóterilgen usynysqa Prezıdentimiz quryltaıda óz pikirin bildirip, ortaq, baıypty sheshimge kelýge shaqyrǵanyn aıtty. Jalpy jurtshylyqpen birge, memlekettik sımvolıkany zerttep júrgen geraldıka salasynyń kásipqoı mamandarynyń usynystary jete talqylanýy qajettigine nazar aýdardy.
– Bizdiń Gerb san ǵasyrlyq tarıhymyzdy tańbalaıtyn, memleketimizdiń aıbynyn asyratyn, halqymyzdyń asqaq rýhyn aıshyqtaıtyn negizgi sımvol bolýy kerek. Eń bastysy, elimizdiń bolashaqqa umtylysyn beıneleıtin biregeı atrıbýtıkasyna aınalýy tıis. Bul, árıne, qoǵam men arnaýly komıssııanyń quzyretindegi másele, – dedi E.Qoshanov.
Palata tóraǵasy Prezıdent depýtattardyń bastamasymen ázirlengen lýdomanııaǵa qarsy kúres jónindegi zań jobasyn osy sessııanyń sońyna deıin qabyldaýdy tapsyrǵanyn atap ótti. Esirtkini óndirý men taratý, vandalızm jáne t.b. problemalardyń sheshimi zańnamalyq deńgeıde retteýdi talap etedi.
Sonymen qatar arheologııa, memlekettik rámizder men memlekettik nagradalar salasyndaǵy zańnamany da jetildirý qajet.
– Ulttyq quryltaıda kóterilgen mańyzdy máseleler jóninde Parlamenttik tyńdaý ótkizýimiz qajet dep sanaımyn. Sebebi keleli jıynda aıtylǵan naqty usynystardy oryndaý boıynsha maqsat-mindetterimizdi birge aıqyndaýymyz kerek, – dep qorytyndylady sózin E.Qoshanov.
