Qazaqstan men Ońtústik Koreıa elderi arasyndaǵy áýe reısterin arttyrý týraly sheshim qabyldandy, dep habarlaıdy “Adyrna” ulttyq portaly QR Kólik mınıstrliginiń baspasóz qyzmetine siltep.
«Almatyda Qazaqstan Respýblıkasy men Koreıa Respýblıkasynyń avıaııalyq bıligi arasynda ekijaqty kelissózder ótti. Qazaqstan Respýblıkasy Kólik mınıstrligi Azamattyq avıaııa komıtetiniń tóraǵasy Saltanat Tompıeva Koreıa Respýblıkasynyń Azamattyq avıaııa basqarmasynyń bas dırektory Iong Kýk Kımmen kezdesý ótkizdi», - delingen habarlamada.
Taraptar elder arasyndaǵy ruqsat etilgen reısterdiń jalpy sanyn aptasyna 10-nan 42-ge deıin ulǵaıtýǵa kelisti.
Sondaı-aq aptasyna 40 júk reısin, onyń ishinde «áýe erkindiginiń» besinshi dárejesin paıdalaný quqyǵyn berý týraly kelisimge qol jetkizildi.
Kelissózder barysynda baǵyttar men belgilengen tasymaldaýshylar sanyna qoıylǵan shekteýler alynyp tastaldy, bul básekelestikti arttyryp, elder arasyndaǵy ushý geografııasyn keńeıtedi.
Taraptar áýe tasymaldaýshylarynyń eki eldiń astanalary arasynda tikeleı áýe qatynasyn ornatý nıetterin qoldady.
