Pavlodarda 63 mln teńge jymqyrǵany úshin balabaqsha dırektory men bas esepshisi sottaldy, dep habarlaıdy «Adyrna» tilshisi Polisia.kz-ke silteme jasap.
62 jastaǵy qala turǵyny balabaqsha dırektory laýazymynda jumys istep, esepshisimen birge ózine senip tapsyrylǵan múlikti asa iri mólsherde jymqyrý jolymen urlap ketken.
Dırektor men esepshi jeti jyl ishinde zańsyz birneshe shtattyq birlikterdi belgilep jáne belgilengen birlikterden tys qosymsha tólemderdi óz paıdasyna zańsyz eseptep otyrǵan. Sondaı-aq mindetti zeınetaqy jarnalary men mindetti áleýmettik medıınalyq saqtandyrýǵa aýdarmalar jasaǵan.
«Osylaısha qaskóıler memleketke jalpy somasy 63 mln teńgege jýyq materıaldyq shyǵyn keltirdi. Sot olardy QR QK-niń 189-babynda (Senip tapsyrylǵan bóten múlikti ıemdenip alý nemese talan-tarajǵa salý) kózdelgen qylmys jasaǵany úshin kináli dep taýyp, jeti jyl merzimge bas bostandyǵynan aıyrý jazasyn taǵaıyndady»,—delingen habarlamada.
Burynǵy balabaqsha dırektory Abaı oblysy QAJD-ǵa qarasty № 23 mekemeniń karantın bólimshesinde jazasyn óteýdi bastady. Sottalǵan azamat óz kinásin moıyndady, memleket paıdasyna jáne jábirlenýshilerge keltirilgen boryshtyń bir bóligin tóledi. Qalǵan boryshty tóleý úshin jazasyn óteý barysynda jumysqa ornalasyp tóleýge de daıyn.
«Al burynǵy esepshige qatysty, sot sottalýshynyń bes jasar qyzy bar ekeniń eskerip, oǵan bes jyl merzimge bas bostandyǵynan aıyrý jazasyn óteýdi keıinge qaldyrdy»,—deıdi mekeme bastyǵynyń orynbasary Anar Sabıeva.
