Qyrǵyzstan prezıdenti Sadyr Japarov «shetel agentteri» týraly zańǵa qol qoıdy, dep habarlaıdy “Adyrna” ulttyq portaly.
Japarov buǵan deıin qarsylyq tanytyp, «atalǵan zańǵa qol qoımaýdy ótinip» úkimettik emes uıymdar men olardyń sheteldik áriptesteri habarlasqanyn aıtqan.
«Elimizde jumys isteıtin úkimettik emes uıymdar 30 jyl boıy esh jerde tirkelmeı keldi. Eshkimge esep bermedi. Olar bankten esep-shot ashyp, sheteldik donorlardan aqsha alyp, óz esepteri úshin de paıdalanyp keldi. Budan bylaı olar basqalar sııaqty Iýstıııa mınıstrliginde tirkeletin bolady. Bank esep-shotyn ashady. Endi olar ashyq jumys isteıdi. Osyǵan deıingideı beı-berekttik bolmaıdy»,-dedi Sadyr Japarov.
Prezıdent otandyq ÚEU sheteldik donorlardy aldap jatqanyn aıtty.
«Donorlar osyndaı qaýesetke senip qalyp, menen zańǵa qol qoımaýdy ótindi. Memleket basshysy retinde eshqandaı qýdalaý bolmaıtynyna kepildik beremin. Biz ıadrolyq memleket emespiz. Ǵaryshqa da ushqaly jatqan joqpyz. Bizdiń memlekettiń sizderden, sizderdiń donorlaryńyzdan jasyratyn qupııamyz joq. Bizde kez kelgen aqparatty ashyq derekkózden tabýǵa bolady»,- dedi prezıdent.
Qyrǵyzstandyq BAQ jazýynsha, bul zań qabyldanǵan soń shet elden qarjylanyratyn uıymdar «sheteldik ókilder» dep atalady. Aıta keteıik, Reseıde osyǵan uqsas zań qabyldanyp, shetelden qarjylanatyn uıymdar «ınoagent» tizimine engen edi. Mundaı uıymdar jylyna keminde bir ret jan-jaqty tekserýden ótedi.
