7 sáýirde keshki saǵat segizdegi jaǵdaı boıynsha, Soltústik Qazaqstan oblysyndaǵy Sergeev sý qoımasynyń tolymdylyǵy 175 paıyz bolǵan (kólemi - 1213 mıllıon tekshe metr). Bul týraly Petropavlovsk.news portaly jarııalady, dep habarlaıdy “Adyrna” ulttyq portady.
Sý qoımasynyń deńgeıi 1190 santımetr (shegi – 800). Bóget tóbesinen asyp ketý 390 santımetr (sońǵy 12 saǵatta 55 santımetr).
Bul 2017 jylǵy tarıhı maksımýmnan 52 santımetrge artyq, bógetten asyp ketý 338 santımet bolǵan, mundaı Sergeev sý qoımasy paıdalanýǵa berilgennen beri, ıaǵnı 1968 jyldan beri baıqalmaǵan.
Sergeev sý elektr kesheninen joǵary qaraı Esil salalarynyń sýy kúrt azaıa bastaǵan. Bul sý tasqyny sheginiń senimdi belgisi, dep túsindiredi basylym. Sondaı-aq, Sergeev sý qoımasyndaǵy sý deńgeıiniń kóterilýi jeksenbi tústen keıin aıtarlyqtaı baıaýlaǵan.
"Endi Sergeev sý qoımasy bógetiniń tómengi jaǵyndaǵy eldi mekender úshin de, iri kólder mańyndaǵy aýyldar úshin de qaýipti kezeń bastalady: Úlken Torańǵyl oıanady", - delingen maqalada.
Sonymen qatar, Memleket basshysy Qasym-Jomart Toqaev Aqmola, Aqtóbe, Qostanaı jáne Soltústik Qazaqstan oblystarynyń ákimderimen telefon arqyly sóılesti.
Atalǵan oblystardyń ákimderi Prezıdentke óńirlerdegi ahýal jaıynda, tabıǵı apatpen kúresý jáne sý tasqynynyń zardaptaryn joıý úshin qabyldanǵan sharalar jóninde esep berdi.
Aımaq basshylarynyń aıtýynsha, jalpy jaǵdaı jiti baqylaýda, tabıǵı apatpen kúresý úshin adam kúshi de, tehnıka da jetkilikti.
Prezıdenttiń tapsyrmasymen Respýblıkalyq shtabqa jetekshilik etetin Premer-Mınıstr Oljas Bektenov bastaǵan Úkimet músheleri sý tasqynynan zardap shekken aımaqtarǵa jiberilgen bolatyn. Azamattardyń qaýipsizdigin qamtamasyz etý, olardyń kerek-jaraǵyn sheshý baǵytynda aýqymdy jumys atqarylyp jatyr.
