Bügınde qaladaǧy 8371 baspana alynyp, onyŋ 6977-sı jöndeletın boldy. Onyŋ ışınde 149 üi basynan salynady. Būl sandar özgeruı de mümkın. Qazırgı taŋda 340 üidıŋ qūrylys jūmysy tolyq aiaqtalyp, ielerıne tapsyrylǧan. «Arysta 2194 üidı qalypqa keltıru jūmysy qyzu jürıp jatyr. Qalǧan 4500-den astam baspananyŋ jūmystary osy aptada bastalady. Jalpy būl jūmystarǧa 168 merdıger kompaniia qūramynda 3531 qūrylysşy tartylǧan. Barlyq sektorlardy kün saiyn aralap, tūrǧyndardyŋ talap-tılegın tyŋdap jürmız», - dedı QR İndustriia jäne infraqūrylymdyq damu bırınşı vise-ministrı Q.Öskenbaev. Oblys basşysy osy oraida öŋır xalqyn qajetınşe tartyp, ärı jūmyspen qamtudy da tapsyrdy. Arystaǧy zaqymdanǧan 66 äleumettık nysannyŋ 62-de "Samūryq-Qazyna" qory jöndeu jūmystaryn bastady. Mūnyŋ 54-ın bılım ǧimarattary qūraidy. Būlar da jaŋa oqu jylyna tolyq aiaqtaluy tiıs. Sonymen bırge «Atameken» ūlttyq käsıpkerler palatasy zardap şekken 456 käsıpkerlık nysandy qalpyna keltıru şaralaryna kırısıp kettı. Öŋır basşysy Ömırzaq Şökeev qūrylysty jospardan keşeuıldetıp jatqan bırneşe sektorǧa jauapty basşylarǧa jūmysty şiratudy tapsyrdy. Atap aitsaq, Qostanai, Aqmola, SQO jäne Aqtöbe oblystarynyŋ ökılderıne jospardan qalmau kerektıgın eskerttı. Sondai-aq Arys qalasynyŋ ziialy qauymy men belsendı azamattaryn, jergılıktı atqaruşy organ men deputattaryn, aqsaqaldaryn da belsendı boluǧa şaqyrdy. «Jalpy Arysta jūmys joǧary deŋgeide atqarylyp jatyr. Tūrǧyndar üilerıne oralǧannan berı 10 kün ışınde barlyq şarualardy bır jüiege keltırıp aldyq. Özge öŋırlerden kelgen qūrylysşylarǧa 40 gradus ystyqta jūmys ısteu oŋai emes. Sondyqtan olarǧa jergılıktı tūrǧyndar da qoldau körsetıp, qalany körkeituge atsalyssyn», - degen öŋır basşysy barlyq jauapty basşylar men mamandarǧa jūmysty küşeitıp, sapaly ärı uaqtyly aiaqtaudy tapsyrdy.
Türkıstan oblysy äkımınıŋ baspasöz qyzmetı
"Adyrna" ūlttyq portaly
