Aýyz sý uńǵymalary tazartylyp jatyr, dep habarlaıdy "Adyrna" tilshisi.
Aýdan ortalyǵy turǵyndaryna belgili Leker kólinde ornalasqan taza sý uńǵymalaryna kólge jınalǵan qardyń sýy kirýine oraı Kaztalov aýylyna jetkizilip jatqan aýyz sý «tutynýǵa jaramsyz» dep tanylǵan bolatyn. Osydan bir apta buryn aýdan ákimi Aslanbek Sarqulovtyń bastamasymen uńǵymalardyń aınalasy bekitilip, sý kóteretin qudyqtar ishine jınalǵan sý syrtqa aıdalyp, tazartylǵan bolatyn.
11 sáýir kúni aýdan basshysy Aslanbek Ahmetollauly Leker kóline baryp, taza aýyz sý uńǵymalaryn tazartý jumysyna qatysty. Baıqaǵanymyzdaı, kólge jınalǵan sýdyń deńgeıi biraz túsken. Uńǵymalardaǵy jınalǵan sý sorylyp, ishin tazartý jumystary atqaryldy. Endigi az ýaqyt ishinde uńǵymylar aınalasy keýip qalatyn túri bar.
Sońǵy kúnderi aýyl turǵyndarynyń aıtýynsha, laılanǵan sýdyń túsi biraz tazarǵany baıqalady. Aýdan basshysy Leker kólindegi uńǵymalar aınalasy sýdan keýip, túgel tazarǵasyn aýyz sý synamalaryn arnaıy zerthanalyq saraptamaǵa joldanatyndyǵyn jetkizdi. Saraptama qorytyndysyna oń shyqsa, jaqyn arada aýyldastar qaıtadan taza aýyz sýmen qamtylatyn bolady.
