QR Premer-Mınıstri Oljas Bektenov apta sońyna deıin sý tasqynynan zardap shekkenderge ótemaqy tóleýdi tapsyrdy, dep habarlaıdy “Adyrna” ulttyq portaly úkimettiń baspasóz qyzmetine siltep.
«QR Premer-Mınıstri Oljas Bektenov sý tasqynynan zardap shekken azamattarǵa keltirilgen shyǵyndy óteý máselesi boıynsha keńes ótkizdi. Búgingi kúni zardap shekken 3561 otbasyna 100 AEK kóleminde joǵalǵan múlki úshin birjolǵy ótemaqy túrinde shamamen 1 mlrd teńge tólendi. Osy aptanyń sońyna deıin barlyq zardap shekkenderge ótemaqy tólenedi», - delingen sársenbi kúni taratqan habarlamada.
Baspanasynan aıyrylǵan turǵyndar úshin zardap shegýshiniń óz tańdaýy boıynsha jańa úıler salynady nemese naryqtan daıyn baspana satyp alynady. Saıajaı boıynsha, eger olar zardap shekken adamnyń jalǵyz úıi bolsa, osyndaı tetik qoldanylatyn bolady.
Keńeste sý tasqyny saldarynan zardap shekken óńirlerdiń ákimderi keltirilgen zalaldy óteý boıynsha júrgizilip jatqan jumystardyń aǵymdaǵy nátıjeleri týraly baıandady. Máselen, Pavlodar oblysynda demeıshilermen birge 119 úı boıynsha zalal ótelip, turýǵa jaramsyz 5 úıdiń qurylysy bastaldy. Qostanaı oblysynda zardap shekkender úshin Arqalyq qalasynan 27 páter satyp alyndy, 1 600 otbasyna áleýmettik kómek tólendi. Aqtóbe oblysynda 44 otbasyna 94,3 mln teńge kóleminde materıaldyq shyǵyn óteldi; 57 jańa úıdiń qurylysy bastaldy.
Ákimdikterdiń jedel derekteri boıynsha búginde zardap shekken úıler sany – 9 627, onyń ishinde:
- 9610 jeke;
- 17 kóppáterli turǵyn úı.
2123 úıge júrgizilgen tehnıkalyq tekserý nátıjelerine sáıkes 1067 úı qalpyna keltirýge jatpaıtyny anyqtaldy, al 1056 úıge jóndeý jumystaryn júrgizýge ruqsat etilgen.
Zardap shekken turǵyn úılerge keltirilgen zalaldy baǵalaý jumystary jalǵasýda.
Úkimet basshysy bul aldyn ala jasalǵan derekter ekenin jáne birqatar óńirlerdegi kúrdeli sý tasqyny jaǵdaıyn eskere otyryp, shyǵyn aýqymy arta túsýi múmkin ekenin atap ótti.
"Prezıdent sý tasqynynan zardap shekken azamattardyń barlyǵyna barynsha kómek kórsetýdi basty mindet etip qoıdy. Sý tartylǵan óńirlerde ákimdikter zardap shekken azamattardyń, joǵalǵan nemese búlingen múlikterdiń tizimin jasaý jáne baǵalaý jumystaryn aıaqtap, shyǵyndardy óteýge kirisýi kerek. Bul rette, tizimge úıleri saý, eshqandaı zardap shekpegen adamdar kirip ketpeýge tıis. Komıssııalardyń jumysyn eshqandaı bıýrokratııaǵa salmaı, jedel uıymdastyrý qajet. Barlyq tıisti qyzmetter jumylyp, kúsheıtilgen rejımde jumys istesin", – dep atap ótti Oljas Bektenov.
Zardap shekken óńirler ákimdikterine jaýapty tulǵalardy jekelegen ýchaskelerge bekite otyryp, sý basqan ǵımarattardy tehnıkalyq tekserý jumystaryn jedel aıaqtaý, jobalardy jergilikti jerge baılanystyrý úshin tez arada jańa jer telimderin anyqtaý tapsyryldy. Premer-mınıstr yqtımal sý tasqynynan barynsha qaýipsiz, damý perspektıvasy joǵary jáne ınfraqurylymmen qamtamasyz etilgen daıyn ýchaskelerdi paıdalanýdy basymdyq retinde belgiledi.
